jang

jang mulkoñ meñ jab bhī hotī hai

log donoñ taraf hī marte haiñ

jiite haare huoñ meñ farq hai kyā

ghar to donoñ taraf ke luTte haiñ

aur luTtā hai

maañ kā har armān

baap kā ḳhvāb

bhaa.ī bahan kā dil

sar se bachchoñ ke sā.ebān kabhī

aur biivī kā āsmān kabhī

dard donoñ taraf sisaktā hai

ḳhuun donoñ taraf ubaltā hai

jang ko jītne kī ḳhushiyāñ bhī

un gharoñ meñ kahīñ nahīñ dikhtīñ

jin ke apne javān sarhad se

apne pairoñ pe ghar nahīñ lauTe

ek tābūt chaar kāñdhoñ par

jis kisī ghar meñ jab bhī aaya hai

dekh kar kaun muskurāyā hai

jang-jū hārtā hai vo phir se

ik na.ī jang chheḌ detā hai

aur ye silsila nahīñ ruktā

nafrateñ nafratoñ kā hal to nahīñ

jang hī jang kā badal to nahīñ

jang se kis kā fā.eda hogā

ab hameñ ye bhī sochnā hogā

mulk aur qaum ke tafāḳhur meñ

jang haivāniyat na ho jaa.e

qatl-e-insāniyat na ho jaa.e

jang mulkon mein jab bhi hoti hai

log donon taraf hi marte hain

jite haare huon mein farq hai kya

ghar to donon taraf ke luTte hain

aur luTta hai

man ka har arman

bap ka KHwab

bhai bahan ka dil

sar se bachchon ke saeban kabhi

aur biwi ka aasman kabhi

dard donon taraf sisakta hai

KHun donon taraf ubalta hai

jang ko jitne ki KHushiyan bhi

un gharon mein kahin nahin dikhtin

jin ke apne jawan sarhad se

apne pairon pe ghar nahin lauTe

ek tabut chaar kandhon par

jis kisi ghar mein jab bhi aaya hai

dekh kar kaun muskuraya hai

jang-ju haarta hai wo phir se

ek nai jang chheD deta hai

aur ye silsila nahin rukta

nafraten nafraton ka hal to nahin

jang hi jang ka badal to nahin

jang se kis ka faeda hoga

ab hamein ye bhi sochna hoga

mulk aur qaum ke tafaKHur mein

jang haiwaniyat na ho jae

qatl-e-insaniyat na ho jae