jangal

ziist kī tang pechīda rāhoñ pe

chalte hue

aise pur-haul jangal meñ ham kis tarah aa ga.e

saḳht sūkhī zamīñ par

daraḳhtoñ ke bojhal tane

tund-ḳhū aur vahshī darindoñ kī mānind

panje jamā.e khaḌe haiñ

un kī sūkhī huī zard shāḳhoñ

insānoñ ke haath paañv

kaTe sar

kaTe jism

baazū

bāzuoñ aur Tāñgoñ se mahrūm dhaḌ

naak naqshe se mahrūm chehre

har ik samt laTke hue haiñ

rāste muntashir

pur-ḳhatar rāste

ek mub.ham añdhere meñ gum haiñ

aur un rāstoñ meñ

ka.ī uñgliyāñ

kaan

uljhe hue baal

vīrān āñkheñ

chhide hoñT

har samt bikhre hue haiñ

zaḳhm-ḳhurda bhaTakte qadam

ḳhud-baḳhud ruk ga.e haiñ

koī insān mujh ko mile magar

to pūchhūñ ki kyā maiñ abhī tak

vahī sho.ala-andām sīmāb-pā

zauq-e-hastī se betāb dard-āshnā

ek insān huuñ

yā faqat koī TuuTā huā haath

baazū

koī naak naqshe se mahrūm chehra huuñ maiñ

aur yuuñ

saḳht shāḳhoñ se laTkī huī huuñ

koī sarshār jazboñ kī jū-e-ravāñ ho

to dekhūñ

ki kyā merī āñkhoñ kī gahrā.iyoñ meñ

abhī tak vahī jur.at-e-dīd hai

rif.at-e-zauq-e-parvāz hai

aur kyā mere a.azā ke ḳham

aur mere ḳhad-o-ḳhāl abhī

zindagī kī sarāhat ke ġhammāz haiñ

lazzat-e-āgahī ke amiiñ haiñ

yā ki ab maiñ bhī bas

kuchh kaTe kaan

vīrān āñkheñ

chhide hoñT

bikhre hue baal huuñ

aur yuuñ

nīm-tārīk gumnām rāhoñ meñ

bikhrī huī huuñ

zist ki tang pechida rahon pe

chalte hue

aise pur-haul jangal mein hum kis tarah aa gae

saKHt sukhi zamin par

daraKHton ke bojhal tane

tund-KHu aur wahshi darindon ki manind

panje jamae khaDe hain

un ki sukhi hui zard shaKHon

insanon ke hath panw

kaTe sar

kaTe jism

bazu

bazuon aur Tangon se mahrum dhaD

nak naqshe se mahrum chehre

har ek samt laTke hue hain

raste muntashir

pur-KHatar raste

ek mubham andhere mein gum hain

aur un raston mein

kai ungliyan

kan

uljhe hue baal

viran aankhen

chhide honT

har samt bikhre hue hain

zaKHm-KHurda bhaTakte qadam

KHud-baKHud ruk gae hain

koi insan mujh ko mile magar

to puchhun ki kya main abhi tak

wahi shoala-andam simab-pa

zauq-e-hasti se betab dard-ashna

ek insan hun

ya faqat koi TuTa hua hath

bazu

koi nak naqshe se mahrum chehra hun main

aur yun

saKHt shaKHon se laTki hui hun

koi sarshaar jazbon ki ju-e-rawan ho

to dekhun

ki kya meri aankhon ki gahraiyon mein

abhi tak wahi jurat-e-did hai

rifat-e-zauq-e-parwaz hai

aur kya mere aaza ke KHam

aur mere KHad-o-KHal abhi

zindagi ki sarahat ke ghammaz hain

lazzat-e-agahi ke amin hain

ya ki ab main bhi bas

kuchh kaTe kan

viran aankhen

chhide honT

bikhre hue baal hun

aur yun

nim-tarik gumnam rahon mein

bikhri hui hun