jazbaat-e-aftab

aah meñ ai dil-e-mazlūm asar paidā kar

jis meñ saudā-e-mohabbat ho vo sar paidā kar

ġham kā tūfāñ bhī agar aa.e to kuchh fikr na kar

qaum kā dard har ik dil meñ magar paidā kar

zulmat-e-ġham kā nishāñ tak na nazar aa.e kahīñ

vo ḳhayālāt kī duniyā meñ sahar paidā kar

sarfaroshoñ kī tarah pahle miTā de ḳhud ko

hind kī ḳhaak se phir la.al-o-gohar paidā kar

aag be-faiz kī daulat ko lagā de yārab

kaam aa.e jo ġharīboñ ke vo zar paidā kar

aaj bhī qaum ke sheroñ kā lahū hai tujh meñ

hausla raam kā bhisham kā jigar paidā kar

hoñ hanūmān aur 'añgad' se hazāroñ yodhdhā

saiñkaḌoñ bhiim aur arjun se bashar paidā kar

āsmāñ kāñptā hai naam se jin ke ab tak

aaj phir qaum meñ vo laḳht-e-jigar paidā kar

phir zarūrat hai javāñ mardoñ kī ai mādar-e-hind

rānā-pratāp se ḳhuddār bashar paidā kar

ahd-e-rafta meñ janam tū ne diyā thā jin ko

mādar-e-hind vahī nūr-e-nazar paidā kar

chain rāhat se agar umr basar karnī hai

dil meñ aġhyār ke bhī uns se ghar paidā kar

gar tamannā hai ki ho saarā zamāna apnā

jazba-e-ishq-o-mohabbat kī nazar paidā kar

'āftāb' ab tirī taqdīr kā chamkegā zarūr

mard ban kar koī duniyā meñ hunar paidā kar

aah mein ai dil-e-mazlum asar paida kar

jis mein sauda-e-mohabbat ho wo sar paida kar

gham ka tufan bhi agar aae to kuchh fikr na kar

qaum ka dard har ek dil mein magar paida kar

zulmat-e-gham ka nishan tak na nazar aae kahin

wo KHayalat ki duniya mein sahar paida kar

sarfaroshon ki tarah pahle miTa de KHud ko

hind ki KHak se phir lal-o-gohar paida kar

aag be-faiz ki daulat ko laga de yarab

kaam aae jo gharibon ke wo zar paida kar

aaj bhi qaum ke sheron ka lahu hai tujh mein

hausla ram ka bhisham ka jigar paida kar

hon hanuman aur 'angad' se hazaron yodhdha

sainkaDon bhim aur arjun se bashar paida kar

aasman kanpta hai nam se jin ke ab tak

aaj phir qaum mein wo laKHt-e-jigar paida kar

phir zarurat hai jawan mardon ki ai madar-e-hind

rana-pratap se KHuddar bashar paida kar

ahd-e-rafta mein janam tu ne diya tha jin ko

madar-e-hind wahi nur-e-nazar paida kar

chain rahat se agar umr basar karni hai

dil mein aghyar ke bhi uns se ghar paida kar

gar tamanna hai ki ho sara zamana apna

jazba-e-ishq-o-mohabbat ki nazar paida kar

'aftab' ab teri taqdir ka chamkega zarur

mard ban kar koi duniya mein hunar paida kar