jhula

aayā sāvan kā mahīna nazar aayā jhūlā

dil ko bhāyā mirī āñkhoñ meñ samāyā jhūlā

saal bhar rah ke bahishtoñ kī fazā meñ mehmāñ

abr kī god meñ baiThā huā aayā jhūlā

cholī-dāman kā sā hai saath ghaTā kā is kā

is taraf aa.ī ghaTā us taraf aayā jhūlā

rut hai jhūle kī na kyoñ aaj ḳhudā.ī jhūle

nannhī kaliyoñ ko havāoñ ne jhulāyā jhūlā

peñg baḌhne lagī āñchal ko ghaTā ke chhūne

baaġh meñ sakhiyoñ ne is tarah jhulāyā jhūlā

jhūmtī aatī haiñ mastāna ghaTā.eñ kaisī

DhūñD kar hai inheñ kis des se laayā jhūlā

giit sun sun ke ghaTā.eñ bhī bahak uThī haiñ

mil ke sakhiyoñ ne kuchh is dhuum se gaayā jhūlā

phuul hilte haiñ idhar shāḳh lachaktī hai udhar

yā bahāroñ ko hai qudrat ne jhulāyā jhūlā

duur pardes meñ ham kis ko jhulā.eñ 'aḳhtar'

hasrat-o-yās kā paiġhām hai laayā jhūlā

aaya sawan ka mahina nazar aaya jhula

dil ko bhaya meri aankhon mein samaya jhula

sal bhar rah ke bahishton ki faza mein mehman

abr ki god mein baiTha hua aaya jhula

choli-daman ka sa hai sath ghaTa ka is ka

is taraf aai ghaTa us taraf aaya jhula

rut hai jhule ki na kyon aaj KHudai jhule

nannhi kaliyon ko hawaon ne jhulaya jhula

peng baDhne lagi aanchal ko ghaTa ke chhune

bagh mein sakhiyon ne is tarah jhulaya jhula

jhumti aati hain mastana ghaTaen kaisi

DhunD kar hai inhen kis des se laya jhula

git sun sun ke ghaTaen bhi bahak uThi hain

mil ke sakhiyon ne kuchh is dhum se gaya jhula

phul hilte hain idhar shaKH lachakti hai udhar

ya bahaaron ko hai qudrat ne jhulaya jhula

dur pardes mein hum kis ko jhulaen 'aKHtar'

hasrat-o-yas ka paigham hai laya jhula