jhuTi nafrat

hamāre dil meñ tumhārī ḳhātir

mohabbateñ thiiñ azal se zinda abad se qaa.em

tumhārā hāthoñ meñ haath le kar vo chuum lenā sabt karnā vo lab mulā.em

tumhāre 'ishq kī hī mānind

tumhārā dukh bhī hamāre dil par rahā thā daa.em

aah yak-dam be-ruḳhī se

vo haath chhoḌe tumhārā jaanā

aur rastoñ meñ dhuul ban kar mirā bikharnā

tumheñ bulānā

vo dhuul honā vo dhuul uḌānā

vo tapte sahrā kī ret par yuuñ

paTaḳh ke sar ko malūl honā

vo rote rote sadā lagānā tumheñ batānā

ki ab talak be-amān rastoñ

pe sard rātoñ kī dhund meñ lipTī

ik sisaktī sī yaad le kar

tumhāre vā'doñ ke āsare par

vo saare vā'de jo jhuuT nikle

mujhe abhī tak gumān kyoñ hai ki sach the shāyad kabhī batāo vo jhuuT the naañ

vahīñ khaḌī hai 'kañval' tumhārī

jahāñ se tum ne badal ke rasta

palaT ke ik baar bhī na dekhā

jahāñ sulagtī sī ret par maiñ

dhuup āñchal ko sar pe oḌhe

july kī jhulsātī lū meñ

ḳhushk sūkhe hue laboñ par

karbalā sī vo pyaas le kar maiñ tiin din se vahīñ khaḌī thī

ye pūchhne ko ki us shaam aisā kyā huā thā ḳhilāf-e-vā’da jo tum na aa.e

tumheñ patā thā ḳhabar thī tum ko

tumheñ gavārā nahīñ thā lekin

ki paas aate mujhe batāte ki aise jaane kā kyā sabab thā binā batā.e

laal rang kā pahan ke joḌā

lagā ke mehñdī sajā ke ḳhud ko

maiñ kitne ghanToñ se muntazir thī magar vo garmī kī shaam haa.e

ḳhilāf-e-vā’da jo tum na aa.e

ki maiñ to us shaam hī mar ga.ī thī

kabhī to aate mujhe batāte ki kyoñ ga.e ho

faqat ye kahte ki mu'āf kar do

koī bhī sikka vafā kā chāhe hamāre kaase meñ tum na bharte faqat batāte ki un darindoñ ke biich mujh sī vo narm-o-nāzuk akelī laḌkī ki jo parindoñ ke phaḌphaḌāne se ḳhauf khātī jo ūñchī āvāzoñ se Dar kar saham sī jaatī

jo jāntī hī nahīñ thī duniyā tumhāre jaise bheḌiyoñ se bharī huī hai

to aaj sun lo

hamāre dil meñ tumhārī ḳhātir

mohabbatoñ kā vo baab jo thā azal se zinda abad se qaa.em

tamām nafrat meñ Dhal chukā hai

jahāñ khile the gulāb saare

vo baaġh chāhat kā jal chukā hai

vo raah taktī 'kañval' kī āñkheñ bhī bujh chukī haiñ

aur us kā dil bhī badal chukā hai

ab us ke dil meñ tumhārī ḳhātir

tamām nafrat tamām nafrat tamām nafrat

aur nafrat ke 'alāva to kuchh nahīñ hai

nahīñ hai kuchh bhī

use batānā

use jalānā use rulānā

nahīñ nahīñ ye nahīñ hai mumkin haañ phir bhī lekin

vo āñkheñ mīche malāl ho kar

'ajīb ġham se niDhāl ho kar

to mat batānā ki nazm kā 'unvān kyā thā

jhūTī nafrat

hamare dil mein tumhaari KHatir

mohabbaten thin azal se zinda abad se qaem

tumhaara hathon mein hath le kar wo chum lena sabt karna wo lab mulaem

tumhaare 'ishq ki hi manind

tumhaara dukh bhi hamare dil par raha tha daem

aah yak-dam be-ruKHi se

wo hath chhoDe tumhaara jaana

aur raston mein dhul ban kar mera bikharna

tumhein bulana

wo dhul hona wo dhul uDana

wo tapte sahra ki ret par yun

paTaKH ke sar ko malul hona

wo rote rote sada lagana tumhein batana

ki ab talak be-aman raston

pe sard raaton ki dhund mein lipTi

ek sisakti si yaad le kar

tumhaare wa'don ke aasare par

wo sare wa'de jo jhuT nikle

mujhe abhi tak guman kyon hai ki sach the shayad kabhi batao wo jhuT the nan

wahin khaDi hai 'kanwal' tumhaari

jahan se tum ne badal ke rasta

palaT ke ek bar bhi na dekha

jahan sulagti si ret par main

dhup aanchal ko sar pe oDhe

july ki jhulsati lu mein

KHushk sukhe hue labon par

karbala si wo pyas le kar main tin din se wahin khaDi thi

ye puchhne ko ki us sham aisa kya hua tha KHilaf-e-wa’da jo tum na aae

tumhein pata tha KHabar thi tum ko

tumhein gawara nahin tha lekin

ki pas aate mujhe batate ki aise jaane ka kya sabab tha bina batae

lal rang ka pahan ke joDa

laga ke mehndi saja ke KHud ko

main kitne ghanTon se muntazir thi magar wo garmi ki sham hae

KHilaf-e-wa’da jo tum na aae

ki main to us sham hi mar gai thi

kabhi to aate mujhe batate ki kyon gae ho

faqat ye kahte ki mu'af kar do

koi bhi sikka wafa ka chahe hamare kase mein tum na bharte faqat batate ki un darindon ke bich mujh si wo narm-o-nazuk akeli laDki ki jo parindon ke phaDphaDane se KHauf khati jo unchi aawazon se Dar kar saham si jati

jo jaanti hi nahin thi duniya tumhaare jaise bheDiyon se bhari hui hai

to aaj sun lo

hamare dil mein tumhaari KHatir

mohabbaton ka wo bab jo tha azal se zinda abad se qaem

tamam nafrat mein Dhal chuka hai

jahan khile the gulab sare

wo bagh chahat ka jal chuka hai

wo rah takti 'kanwal' ki aankhen bhi bujh chuki hain

aur us ka dil bhi badal chuka hai

ab us ke dil mein tumhaari KHatir

tamam nafrat tamam nafrat tamam nafrat

aur nafrat ke 'alawa to kuchh nahin hai

nahin hai kuchh bhi

use batana

use jalana use rulana

nahin nahin ye nahin hai mumkin han phir bhi lekin

wo aankhen miche malal ho kar

'ajib gham se niDhaal ho kar

to mat batana ki nazm ka 'unwan kya tha

jhuTi nafrat