jism ki talash

jism bhī TuuT chukā kaun use pahchāne

ruuh merī mujhe āvāz na de paa.ī kabhī

rāste bhī mirī parchhā.īñ se aage na baḌhe

aur ehsās kī qindīl bujhī shaam Dhale

raat guzrī to huā yuuñ mahsūs

niim vahshī sī kahānī thī sunāne ko jise

sub.h-e-nau jaise dabe paañv chalī aa.ī mire kamre meñ

aur

maiñ shahr-e-ḳhamoshāñ meñ ka.ī sadiyoñ tak

yahī sochā kiyā jaise mirā TuuTā huā bikhrā huā jism

isī farsūda kahānī meñ chhupā baiThā hai

maiñ ne sochā ki

use DhūñDhuñ

use apne qarīb lā.ūñ

aur pūchhūñ ki mirī zaat se ho kar tū judā

kyuuñ asātīr ke zindāñ meñ rahā yuuñ mahbūs

jism bhi TuT chuka kaun use pahchane

ruh meri mujhe aawaz na de pai kabhi

raste bhi meri parchhain se aage na baDhe

aur ehsas ki qindil bujhi sham Dhale

raat guzri to hua yun mahsus

nim wahshi si kahani thi sunane ko jise

subh-e-nau jaise dabe panw chali aai mere kamre mein

aur

main shahr-e-KHamoshan mein kai sadiyon tak

yahi socha kiya jaise mera TuTa hua bikhra hua jism

isi farsuda kahani mein chhupa baiTha hai

main ne socha ki

use DhunDhun

use apne qarib laun

aur puchhun ki meri zat se ho kar tu juda

kyun asatir ke zindan mein raha yun mahbus