judai-e-watan

aaj vo vaqt-e-judā.ī mujhe yaad aayā hai

dil-e-afsurda har ik yaad se bhar aayā hai

ġhair mumkin hai mirī aañkh se aañsū na baheñ

zabt-e-dil ab to har ik had se guzar aayā hai

zindagī ham ko ye mālūm na thā tere liye

apnī hañstī huī duniyā ko rulānā hogā

jin ko dil dekh na saktā thā kabhī afsurda

aaj is dil ne unheñ ashk bahāte dekhā

maañ kī mamtā ne bhī lalkārā jhiñjhoḌā mujh ko

baap nam-dīda khaḌā duur se taktā thā mujhe

aur ik kone meñ vo duur khaḌī jān-e-hayāt

apne afsurda se chehre pe jo Daale thī naqāb

maiñ ne chāhā ki use baḌh ke tasallī de duuñ

sil ga.e hoñT zabāñ ho ga.ī sākit merī

maiñ na kuchh bol sakā aur na kuchh sun paayā

merī nazroñ ne na jaane kahā kyā kyā us se

kitne va.ade kiye aur kitnī uThā.īñ qasmeñ

sub.h-e-nau phuuT rahī thī ki vatan chhūT gayā

dekhte dekhte ḳhvāboñ kā fusūñ TuuT gayā

aaj wo waqt-e-judai mujhe yaad aaya hai

dil-e-afsurda har ek yaad se bhar aaya hai

ghair mumkin hai meri aankh se aansu na bahen

zabt-e-dil ab to har ek had se guzar aaya hai

zindagi hum ko ye malum na tha tere liye

apni hansti hui duniya ko rulana hoga

jin ko dil dekh na sakta tha kabhi afsurda

aaj is dil ne unhen ashk bahate dekha

man ki mamta ne bhi lalkara jhinjhoDa mujh ko

bap nam-dida khaDa dur se takta tha mujhe

aur ek kone mein wo dur khaDi jaan-e-hayat

apne afsurda se chehre pe jo Dale thi naqab

main ne chaha ki use baDh ke tasalli de dun

sil gae honT zaban ho gai sakit meri

main na kuchh bol saka aur na kuchh sun paya

meri nazron ne na jaane kaha kya kya us se

kitne wade kiye aur kitni uThain qasmen

subh-e-nau phuT rahi thi ki watan chhuT gaya

dekhte dekhte KHwabon ka fusun TuT gaya