kabus

raat ke pahlū meñ

baiThā hai sunahrī azhdahā

ahmarīñ phunkār ke

maddham suroñ kā shor hai

is ghaḌī lagtā hai vo kuchh aur hai

band hote aur khulte dā.eroñ ke darmiyāñ

aap apnī zaat ke girdāb meñ

jaise koī devtā mehrāb meñ

vaqt ke is naqsha-e-mubham pe kaun

us ke maskan kā lagā.egā surāġh

kaun rakkhegā hathelī par charāġh

is ke nīsh-e-ārzū ke zā.iqe chakkhegā kaun

kis ko dildārī kī fursat hai yahāñ

haañ magar ye raat hai is kī rafīq

der tak apnā badan dasvā.egī

subah hone tak usī ke rañg meñ rañg jā.egī

raat ke pahlu mein

baiTha hai sunahri azhdaha

ahmarin phunkar ke

maddham suron ka shor hai

is ghaDi lagta hai wo kuchh aur hai

band hote aur khulte daeron ke darmiyan

aap apni zat ke girdab mein

jaise koi dewta mehrab mein

waqt ke is naqsha-e-mubham pe kaun

us ke maskan ka lagaega suragh

kaun rakkhega hatheli par charagh

is ke nish-e-arzu ke zaiqe chakkhega kaun

kis ko dildari ki fursat hai yahan

han magar ye raat hai is ki rafiq

der tak apna badan daswaegi

subah hone tak usi ke rang mein rang jaegi