kaam wali

jañgalī phuul kī tarah

qudratī husn liye

jaise adh-pake phal ko khāne

bechain ho jaa.e koī

sirf ek suutī saarī kā libās

sundar siDaul badan

jīvan kī ghar grihastī meñ

rakhā thā qadam

ek doshīza ne jab

vaqt kī silvaToñ ne

banā diyā bad-rañg nishān

ek sehat-mand jism ko

kar diyā kamzor

sālāna paidāvār kī tarah

bachchoñ kī paidā.ish ne

ek do tiin chaar

are bas bhī kar

apnā haal to dekh

kyuuñ apnī jaan

gañvāne pe tulī hai

baat aa ga.ī samajh

nas-bandī karā lī

is pe nikammā sharābī shauhar

ghar ghar kaam na kare

to peT kaise bhare

gaañv meñ kyā dharā hai

banjar zamīn

nā khaad nā paanī

shahr meñ do paise kā

jugāḌ to hai

apnā kamātī huuñ

parivār pāltī huuñ

kaam vaalī huuñ maiñ

uuñh dekhā hai bahut sī

ghar mālkinoñ ko

ġhulāmī kā jīvan jiite

un se behtar haal hai merā

is kachche ghar meñ

apnā raaj chalātī huuñ

jangali phul ki tarah

qudrati husn liye

jaise adh-pake phal ko khane

bechain ho jae koi

sirf ek suti sari ka libas

sundar siDaul badan

jiwan ki ghar grihasti mein

rakha tha qadam

ek doshiza ne jab

waqt ki silwaTon ne

bana diya bad-rang nishan

ek sehat-mand jism ko

kar diya kamzor

salana paidawar ki tarah

bachchon ki paidaish ne

ek do tin chaar

are bas bhi kar

apna haal to dekh

kyun apni jaan

ganwane pe tuli hai

baat aa gai samajh

nas-bandi kara li

is pe nikamma sharabi shauhar

ghar ghar kaam na kare

to peT kaise bhare

ganw mein kya dhara hai

banjar zamin

na khad na pani

shahr mein do paise ka

jugaD to hai

apna kamati hun

pariwar palti hun

kaam wali hun main

unh dekha hai bahut si

ghar malkinon ko

ghulami ka jiwan jite

un se behtar haal hai mera

is kachche ghar mein

apna raj chalati hun