kaamyabi ka nusKHa

be-kār gar haiñ aap to ik kaam kījiye

makkhan lagāne vāloñ meñ kuchh naam kījiye

is kaam meñ ziyāda nahīñ koī dauḌ-dhūp

thoḌī ḳhushāmadeñ sahar-o-shām kījiye

hoñ shaiḳh jī to kījiye jhuk kar unheñ salām

panDit ko haath joḌ ke parnām kījiye

kuchh der dum hilā.iye aaqā ke sāmne

phailā ke paañv ghar pe phir ārām kījiye

kyoñ ghar pe apne khā.iye sūkhā chanā maTar

saath un ke hazm pista-o-bādām kījiye

v I P kī ḳhaas attachi bane hue

chāroñ taraf safar sahar-o-shām kījiye

jaa.eñ vo jis maqām pe rahiye unhīñ ke saath

hamrāh un ke shuġhl mai-o-jām kījiye

yārān-e-ham-mazāq kī mahfil sajā.iye

jo muttafiq na ho use badnām kījiye

logoñ pe apnā ro.ab jamāne ke vāste

ghar par bulā ke dāvat-e-hukkām kījiye

be-kār naujavānoñ kā halqa banā.iye

va.ada pa.e-vazīfa-o-in.ām kījiye

chanda baTorne kā bhī gur siikh jā.iye

lachhmī ko jis tarah se bhī ho raam kījiye

smuggler aur kursī-nashīnoñ ke darmiyāñ

pul ban ke len-den kā har kaam kījiye

koThī na.ī black ke dhan se banā.iye

taz.īn-e-farsh-o-tāq-o-dar-o-bām kījiye

jantā kā ḳhuun bechiye paise kamā.iye

kyoñ shikva-hā.e gardish-e-ayyām kījiye

apnī ġharaz ke aage sadā-e-zamīr kyā

saare takallufāt ko nīlām kījiye

ahl-e-hunar kā bazm meñ gul ho chukā charāġh

chamcha-garī ke faiz ko ab aam kījiye

is nusḳha-e-jadīd se gar ho na fā.eda

tab 'jām.ī' ko morid-e-ilzām kījiye

be-kar gar hain aap to ek kaam kijiye

makkhan lagane walon mein kuchh nam kijiye

is kaam mein ziyaada nahin koi dauD-dhup

thoDi KHushamaden sahar-o-sham kijiye

hon shaiKH ji to kijiye jhuk kar unhen salam

panDit ko hath joD ke parnam kijiye

kuchh der dum hilaiye aaqa ke samne

phaila ke panw ghar pe phir aaram kijiye

kyon ghar pe apne khaiye sukha chana maTar

sath un ke hazm pista-o-baadam kijiye

w I P ki KHas attachi bane hue

chaaron taraf safar sahar-o-sham kijiye

jaen wo jis maqam pe rahiye unhin ke sath

hamrah un ke shughl mai-o-jam kijiye

yaran-e-ham-mazaq ki mahfil sajaiye

jo muttafiq na ho use badnam kijiye

logon pe apna roab jamane ke waste

ghar par bula ke dawat-e-hukkaam kijiye

be-kar naujawanon ka halqa banaiye

wada pae-wazifa-o-inam kijiye

chanda baTorne ka bhi gur sikh jaiye

lachhmi ko jis tarah se bhi ho ram kijiye

smuggler aur kursi-nashinon ke darmiyan

pul ban ke len-den ka har kaam kijiye

koThi nai black ke dhan se banaiye

tazin-e-farsh-o-taq-o-dar-o-baam kijiye

janta ka KHun bechiye paise kamaiye

kyon shikwa-hae gardish-e-ayyam kijiye

apni gharaz ke aage sada-e-zamir kya

sare takallufat ko nilam kijiye

ahl-e-hunar ka bazm mein gul ho chuka charagh

chamcha-gari ke faiz ko ab aam kijiye

is nusKHa-e-jadid se gar ho na faeda

tab 'jami' ko morid-e-ilzam kijiye