kanTon se pyar ho jae

guloñ ke saath jo kāñToñ se pyaar ho jaa.e

ḳhizāñ bhī apne chaman kī bahār ho jaa.e

mirā chaman hai ki har rang meñ mujhe maqbūl

ye lāla-zār ho yā ḳhār-zār ho jaa.e

hasīn vādiyāñ chashme ba-ma.a ḳhas-o-ḳhāshāk

tazād-e-husn jo dekhe nisār ho jaa.e

nazar milāo mirī aañkh meñ jo paanī hai

ruke to motī gire ābshār ho jaa.e

ḳhatā vahī hai ki jo bhuul se ho ik do baar

ye kyā ḳhatā hai ki jo baar baar ho jaa.e

ye sang-o-ḳhisht nahīñ dil hai dil meñ dhaḌkan hai

na chheḌo is ko kahīñ dāġh-dār ho jaa.e

kaho to kaisī rahī apnī dāstāñ 'hindī'

jo us kī surḳhī hī sīna-figār ho jaa.e

gulon ke sath jo kanTon se pyar ho jae

KHizan bhi apne chaman ki bahaar ho jae

mera chaman hai ki har rang mein mujhe maqbul

ye lala-zar ho ya KHar-zar ho jae

hasin wadiyan chashme ba-ma KHas-o-KHashak

tazad-e-husn jo dekhe nisar ho jae

nazar milao meri aankh mein jo pani hai

ruke to moti gire aabshaar ho jae

KHata wahi hai ki jo bhul se ho ek do bar

ye kya KHata hai ki jo bar bar ho jae

ye sang-o-KHisht nahin dil hai dil mein dhaDkan hai

na chheDo is ko kahin dagh-dar ho jae

kaho to kaisi rahi apni dastan 'hindi'

jo us ki surKHi hi sina-figar ho jae