kaDwa sach

maiñ faqat jism nahīñ zehn bhī huuñ

sab qasīde lab-o-ruḳhsār ke bar-haq lekin

chashm-e-maigūñ ke udhar

qāmat-e-shamshād ke saath

zulf-e-pechāñ se pare

merī ik soch bhī hai fikr bhī hai

maiñ ki taḳhlīq-e-bashar kā huuñ vasīla lekin

kyuuñ dikhā.ī nahīñ detā hai tumheñ merā shu.ūr

merī dānish ke ka.ī rang haiñ tārīḳh ke paas

mere afkār mirī raa.e mirā tarz-e-ḳhayāl

in kī tauqīr karo

tum ne aurat ko faqat hūr-shamā.il samjhā

nāvak-e-ishq kā ghāyal samjhā

tum ne sadiyoñ se adhūrā mujhe taslīm kiyā

is meñ tarmīm karo

sach kī tāzīm karo

maiñ faqat jism nahīñ zehn bhī huuñ

maiñ ikaa.ī huuñ mukammal mujhe taslīm karo

main faqat jism nahin zehn bhi hun

sab qaside lab-o-ruKHsar ke bar-haq lekin

chashm-e-maigun ke udhar

qamat-e-shamshad ke sath

zulf-e-pechan se pare

meri ek soch bhi hai fikr bhi hai

main ki taKHliq-e-bashar ka hun wasila lekin

kyun dikhai nahin deta hai tumhein mera shuur

meri danish ke kai rang hain tariKH ke pas

mere afkar meri rae mera tarz-e-KHayal

in ki tauqir karo

tum ne aurat ko faqat hur-shamail samjha

nawak-e-ishq ka ghayal samjha

tum ne sadiyon se adhura mujhe taslim kiya

is mein tarmim karo

sach ki tazim karo

main faqat jism nahin zehn bhi hun

main ikai hun mukammal mujhe taslim karo