kahani

baḌī lambī kahānī hai sunoge?

sahar kī aañkh khulne bhī na paa.ī thī

mire tarkash ne lākhoñ tiir barsā.e shuāoñ ke

kisī ne āftābāna har ik zarre ko chamkāyā

kisī ne māhtābī chādareñ har samt phailā.īñ

koī jugnū kī sūrat jhilmilāyā

inhīñ bikhre hue tīroñ ke zer-e-sāya

maiñ chaltā rahā

har moḌ pe koī na koī vāqi.a

koī na koī hādsa

mere ujāle ko lipaT kar chaaT kar

dīmak-zada kartā rahā lekin

safar kī dhun salāmat

jumbish-e-pā aage baḌhtī hī rahī

koh-e-girāñ piste rahe

sāgar kī lahreñ dam-ba-ḳhud hotī rahīñ

maiñ baḌhte baḌhte sarhad-e-imroz tak aa pahuñchā

ye maanā duur hai manzil

ye maanā ābla-pā huuñ

ġhubār-e-gardish-e-ayyām meñ lipTā huā

lekin abhī phailā huā hai silsila mere ujāloñ kā

abhī tarkash meñ lākhoñ tiir baaqī haiñ

abhī merī kahānī ḳhatm ko pahuñchī nahīñ hai

ye baḌī lambī kahānī hai

baDi lambi kahani hai sunoge?

sahar ki aankh khulne bhi na pai thi

mere tarkash ne lakhon tir barsae shuaon ke

kisi ne aaftabana har ek zarre ko chamkaya

kisi ne mahtabi chadaren har samt phailain

koi jugnu ki surat jhilmilaya

inhin bikhre hue tiron ke zer-e-saya

main chalta raha

har moD pe koi na koi waqia

koi na koi hadsa

mere ujale ko lipaT kar chaT kar

dimak-zada karta raha lekin

safar ki dhun salamat

jumbish-e-pa aage baDhti hi rahi

koh-e-giran piste rahe

sagar ki lahren dam-ba-KHud hoti rahin

main baDhte baDhte sarhad-e-imroz tak aa pahuncha

ye mana dur hai manzil

ye mana aabla-pa hun

ghubar-e-gardish-e-ayyam mein lipTa hua

lekin abhi phaila hua hai silsila mere ujalon ka

abhi tarkash mein lakhon tir baqi hain

abhi meri kahani KHatm ko pahunchi nahin hai

ye baDi lambi kahani hai