kahani banao

maiñ sahrā kī taptī huī ret

ke sañg uḌtā huā ek āvāra kāġhaz

kahāñ se chalā thā kahāñ aa gayā huuñ

vo sab dāstāneñ jo mujh pe likhī thiiñ

vo kuchh bārishoñ aur kuchh āñdhiyoñ kī ġhizā ban chukī haiñ

ki phailī huī raushnā.ī ke dhabboñ ne

mere badan ko dhuāñ kar diyā hai

mire lafz lafzoñ se yuuñ mil ga.e haiñ

ki paḌhnā bhī chāho to paḌh na sakoge

yahāñ kyā likhā thā vahāñ kyā likhā thā

tumheñ hai tajassus mirī dāstāñ kā

to aao mire saath kuchh der aao

magar yaad rakkho

tumhārī tarah ke mirī dāstāñ meñ

hazāroñ paḌe haiñ

jinheñ bas fasāne banāne kī ḳhātir

yūñhī kāġhazoñ ko uThāne kī dhun hai

magar maiñ vo kāġhaz vo kāġhaz nahīñ huuñ

jo kamroñ ke konoñ se aate ki jaate hue haath aa.e

fasāne sunā.e

maiñ ik dāstāñ huuñ

mirā bāb-e-avval hai sahrā kahānī

jhulastī taḌaptī huī zindagānī

kahīñ pe maiñ tesha kahīñ tiir huuñ maiñ

kahīñ pe maiñ majnūñ kahīñ hiir huuñ maiñ

havāoñ ke jhoñkoñ ke rahm-o-karam par

maiñ uḌtā huā ek āvāra kāġhaz

gumāñ kā nahīñ ik yaqīñ kā amiiñ huuñ

mirī justujū hai to sahrā meñ aao

ki chhāloñ kī lazzat ke sadme uThāo

ki kuchh ret oḌho ki kuchh ret phāñko

kahānī banāo

tumheñ ye kahānī gavāra nahīñ to

hazāroñ muzayyan fasāne paḌe haiñ

unheñ jā ke dekho vahīñ Duub jaao

maiñ āvāra kāġhaz pe likkhī huī

ḳhūñ-chakāñ dāstāñ huuñ

fasāna samajh kar mujhe bhuul jaao

main sahra ki tapti hui ret

ke sang uDta hua ek aawara kaghaz

kahan se chala tha kahan aa gaya hun

wo sab dastanen jo mujh pe likhi thin

wo kuchh barishon aur kuchh aandhiyon ki ghiza ban chuki hain

ki phaili hui raushnai ke dhabbon ne

mere badan ko dhuan kar diya hai

mere lafz lafzon se yun mil gae hain

ki paDhna bhi chaho to paDh na sakoge

yahan kya likha tha wahan kya likha tha

tumhein hai tajassus meri dastan ka

to aao mere sath kuchh der aao

magar yaad rakkho

tumhaari tarah ke meri dastan mein

hazaron paDe hain

jinhen bas fasane banane ki KHatir

yunhi kaghazon ko uThane ki dhun hai

magar main wo kaghaz wo kaghaz nahin hun

jo kamron ke konon se aate ki jate hue hath aae

fasane sunae

main ek dastan hun

mera bab-e-awwal hai sahra kahani

jhulasti taDapti hui zindagani

kahin pe main tesha kahin tir hun main

kahin pe main majnun kahin hir hun main

hawaon ke jhonkon ke rahm-o-karam par

main uDta hua ek aawara kaghaz

guman ka nahin ek yaqin ka amin hun

meri justuju hai to sahra mein aao

ki chhaalon ki lazzat ke sadme uThao

ki kuchh ret oDho ki kuchh ret phanko

kahani banao

tumhein ye kahani gawara nahin to

hazaron muzayyan fasane paDe hain

unhen ja ke dekho wahin Dub jao

main aawara kaghaz pe likkhi hui

KHun-chakan dastan hun

fasana samajh kar mujhe bhul jao