kahani

suno tum likh ke de do nā

kahānī meñ kahāñ sach hai

kahāñ pe ruk ke tum ne ġhāliban kuchh jhuuT likhnā hai

kahāñ aisā koī ik moḌ aanā hai

jahāñ chālān mumkin hai

kahāñ vo besh-qīmat sā

sunahrī chhoTā sā Dibbā jo apnī dhaḌkanoñ se apne hone kī gavāhī de rahā hai

TuuT jaanā hai

kahāñ qaarī ko samjhānā hai

dukh ke is alaav meñ jhulastī sī kahānī rok denā hī zarūrī hai

safar meñ ruk ke sab ko alvidā.a kahne kā lamha lāzmī hai

kahāñ tārīḳh likh ke is qalam ko jeb meñ rakhnā zarūrī ho gayā hai

suno tum ye batāo nā

tumhārī tilsmātī sī kahānī meñ koī kirdār to hogā

jo zimmedār hogā

kahāñ par markazī kirdār ne dukh dard siine meñ chhupānā hai

falak ko bad-gumāñ kar ke

zamīñ ko āsmāñ hotā dikhānā hai

nadāmat aur malāmat saath rakhnī hai

har ik saa.at ke saare dukh uThāne haiñ

nibhāne haiñ

batānā hai

mohabbat zindagī kā isti.āra hai

mohabbat raat kā pahlā sitāra hai

yā

dukh kā āḳhirī koī kināra hai

suno tum likh ke de do na

kahani mein kahan sach hai

kahan pe ruk ke tum ne ghaaliban kuchh jhuT likhna hai

kahan aisa koi ek moD aana hai

jahan chaalan mumkin hai

kahan wo besh-qimat sa

sunahri chhoTa sa Dibba jo apni dhaDkanon se apne hone ki gawahi de raha hai

TuT jaana hai

kahan qari ko samjhana hai

dukh ke is alaw mein jhulasti si kahani rok dena hi zaruri hai

safar mein ruk ke sab ko alwidaa kahne ka lamha lazmi hai

kahan tariKH likh ke is qalam ko jeb mein rakhna zaruri ho gaya hai

suno tum ye batao na

tumhaari tilsmati si kahani mein koi kirdar to hoga

jo zimmedar hoga

kahan par markazi kirdar ne dukh dard sine mein chhupana hai

falak ko bad-guman kar ke

zamin ko aasman hota dikhana hai

nadamat aur malamat sath rakhni hai

har ek saat ke sare dukh uThane hain

nibhane hain

batana hai

mohabbat zindagi ka istiara hai

mohabbat raat ka pahla sitara hai

ya

dukh ka aaKHiri koi kinara hai