kahin kuchh jal raha hai

jab parinde lahūluhān ho kar āsmān se gir rahe the

maiñ paanī ke qatre se motī chun rahī thī

jab kabūtaroñ ke ġhol ġhā.eb the

āsmān par shamshīreñ chamak rahī thiiñ

maiñ bādaloñ ko bosa de rahī thī

āsmānī baḳhshish ne mere kore canvās par

likh dī ek nazm

vahāñ sāhiloñ par uḌte hue parinde the

bārish thī

aur kabūtaroñ ke ġhol

āsmān kā rang niilā thā

pariyāñ koh-e-qāf se duā.eñ le kar lauTī thiiñ

maut kī sarhadoñ se alag

jab bachchoñ kī loriyoñ meñ

ḳhauf kī mausīqī shāmil ho rahī thī

maiñ ek achchhe din kī nazm

pariyoñ kī kahānī ke saath

un bachchoñ ko sunānā chāhtī thī

jab parinde lahuluhan ho kar aasman se gir rahe the

main pani ke qatre se moti chun rahi thi

jab kabutaron ke ghol ghaeb the

aasman par shamshiren chamak rahi thin

main baadalon ko bosa de rahi thi

aasmani baKHshish ne mere kore canwas par

likh di ek nazm

wahan sahilon par uDte hue parinde the

barish thi

aur kabutaron ke ghol

aasman ka rang nila tha

pariyan koh-e-qaf se duaen le kar lauTi thin

maut ki sarhadon se alag

jab bachchon ki loriyon mein

KHauf ki mausiqi shamil ho rahi thi

main ek achchhe din ki nazm

pariyon ki kahani ke sath

un bachchon ko sunana chahti thi