aurat

Kaifi Azmi

aurat

Kaifi Azmi

MORE BY Kaifi Azmi

    uTh mirī jaan mire saath chalnā hai tujhe

    qalb-e-māhaul meñ larzāñ sharar-e-jañg haiñ aaj

    hausle vaqt ke aur ziist ke yak-rañg haiñ aaj

    ābgīnoñ meñ tapāñ valvala-e-sañg haiñ aaj

    husn aur ishq ham-āvāz o ham-āhañg haiñ aaj

    jis meñ jaltā huuñ usī aag meñ jalnā hai tujhe

    uTh mirī jaan mire saath chalnā hai tujhe

    tere qadmoñ meñ hai firdaus-e-tamaddun bahār

    terī nazroñ pe hai tahzīb o taraqqī madār

    terī āġhosh hai gahvāra-e-nafs-o-kirdār

    tā-ba-kai gird tire vahm o ta.ayyun hisār

    kauñd kar majlis-e-ḳhalvat se nikalnā hai tujhe

    uTh mirī jaan mire saath chalnā hai tujhe

    ki be-jān khilaunoñ se bahal jaatī hai

    taptī sāñsoñ harārat se pighal jaatī hai

    paañv jis raah meñ rakhtī hai phisal jaatī hai

    ban ke sīmāb har ik zarf meñ Dhal jaatī hai

    ziist ke āhanī sāñche meñ bhī Dhalnā hai tujhe

    uTh mirī jaan mire saath chalnā hai tujhe

    zindagī jehd meñ hai sabr ke qaabū meñ nahīñ

    nabz-e-hastī lahū kāñpte aañsū meñ nahīñ

    uḌne khulne meñ hai nik.hat ḳham-e-gesū meñ nahīñ

    jannat ik aur hai jo mard ke pahlū meñ nahīñ

    us āzād ravish par bhī machalnā hai tujhe

    uTh mirī jaan mire saath chalnā hai tujhe

    goshe goshe meñ sulagtī hai chitā tere liye

    farz bhes badaltī hai qazā tere liye

    qahr hai terī har ik narm adā tere liye

    zahr zahr hai duniyā havā tere liye

    rut badal Daal agar phūlnā phalnā hai tujhe

    uTh mirī jaan mire saath chalnā hai tujhe

    qadr ab tak tirī tārīḳh ne jaanī nahīñ

    tujh meñ sho.ale bhī haiñ bas ashk-fishānī nahīñ

    haqīqat bhī hai dilchasp kahānī nahīñ

    terī hastī bhī hai ik chiiz javānī nahīñ

    apnī tārīḳh unvān badalnā hai tujhe

    uTh mirī jaan mire saath chalnā hai tujhe

    toḌ kar rasm but band-e-qadāmat se nikal

    zof-e-ishrat se nikal vahm-e-nazākat se nikal

    nafs ke khīñche hue halqa-e-azmat se nikal

    qaid ban jaa.e mohabbat to mohabbat se nikal

    raah ḳhaar kyā gul bhī kuchalnā hai tujhe

    uTh mirī jaan mire saath chalnā hai tujhe

    toḌ ye azm-shikan daġhdaġha-e-pand bhī toḌ

    terī ḳhātir hai jo zanjīr vo saugand bhī toḌ

    tauq ye bhī hai zamurrad gulū-band bhī toḌ

    toḌ paimāna-e-mardān-e-ḳhirad-mand bhī toḌ

    ban ke tūfān chhalaknā hai ubalnā hai tujhe

    uTh mirī jaan mire saath chalnā hai tujhe

    falātūn o arastū hai zahrā parvīñ

    tere qabze meñ hai gardūñ tirī Thokar meñ zamīñ

    haañ uThā jald uThā pā-e-muqaddar se jabīñ

    maiñ bhī rukne nahīñ vaqt bhī rukne nahīñ

    laḌkhaḌā.egī kahāñ tak ki sambhalnā hai tujhe

    uTh mirī jaan mire saath chalnā hai tujhe

    uTh meri jaan mere sath hi chalna hai tujhe

    qalb-e-mahaul mein larzan sharar-e-jang hain aaj

    hausle waqt ke aur zist ke yak-rang hain aaj

    aabginon mein tapan walwala-e-sang hain aaj

    husn aur ishq ham-awaz o ham-ahang hain aaj

    jis mein jalta hun usi aag mein jalna hai tujhe

    uTh meri jaan mere sath hi chalna hai tujhe

    tere qadmon mein hai firdaus-e-tamaddun ki bahaar

    teri nazron pe hai tahzib o taraqqi ka madar

    teri aaghosh hai gahwara-e-nafs-o-kirdar

    ta-ba-kai gird tere wahm o tayyun ka hisar

    kaund kar majlis-e-KHalwat se nikalna hai tujhe

    uTh meri jaan mere sath hi chalna hai tujhe

    tu ki be-jaan khilaunon se bahal jati hai

    tapti sanson ki hararat se pighal jati hai

    panw jis rah mein rakhti hai phisal jati hai

    ban ke simab har ek zarf mein Dhal jati hai

    zist ke aahani sanche mein bhi Dhalna hai tujhe

    uTh meri jaan mere sath hi chalna hai tujhe

    zindagi jehd mein hai sabr ke qabu mein nahin

    nabz-e-hasti ka lahu kanpte aansu mein nahin

    uDne khulne mein hai nikhat KHam-e-gesu mein nahin

    jannat ek aur hai jo mard ke pahlu mein nahin

    us ki aazad rawish par bhi machalna hai tujhe

    uTh meri jaan mere sath hi chalna hai tujhe

    goshe goshe mein sulagti hai chita tere liye

    farz ka bhes badalti hai qaza tere liye

    qahr hai teri har ek narm ada tere liye

    zahr hi zahr hai duniya ki hawa tere liye

    rut badal Dal agar phulna phalna hai tujhe

    uTh meri jaan mere sath hi chalna hai tujhe

    qadr ab tak teri tariKH ne jaani hi nahin

    tujh mein shoale bhi hain bas ashk-fishani hi nahin

    tu haqiqat bhi hai dilchasp kahani hi nahin

    teri hasti bhi hai ek chiz jawani hi nahin

    apni tariKH ka unwan badalna hai tujhe

    uTh meri jaan mere sath hi chalna hai tujhe

    toD kar rasm ka but band-e-qadamat se nikal

    zof-e-ishrat se nikal wahm-e-nazakat se nikal

    nafs ke khinche hue halqa-e-azmat se nikal

    qaid ban jae mohabbat to mohabbat se nikal

    rah ka KHar hi kya gul bhi kuchalna hai tujhe

    uTh meri jaan mere sath hi chalna hai tujhe

    toD ye azm-shikan daghdagha-e-pand bhi toD

    teri KHatir hai jo zanjir wo saugand bhi toD

    tauq ye bhi hai zamurrad ka gulu-band bhi toD

    toD paimana-e-mardan-e-KHirad-mand bhi toD

    ban ke tufan chhalakna hai ubalna hai tujhe

    uTh meri jaan mere sath hi chalna hai tujhe

    tu falatun o arastu hai tu zahra parwin

    tere qabze mein hai gardun teri Thokar mein zamin

    han uTha jald uTha pa-e-muqaddar se jabin

    main bhi rukne ka nahin waqt bhi rukne ka nahin

    laDkhaDaegi kahan tak ki sambhalna hai tujhe

    uTh meri jaan mere sath hi chalna hai tujhe

    Videos
    This video is playing from YouTube

    Videos
    This video is playing from YouTube

    Kaifi Azmi

    Kaifi Azmi

    RECITATIONS

    Nomaan Shauque

    Nomaan Shauque

    Nomaan Shauque

    aurat Nomaan Shauque

    Tagged Under

    0
    COMMENTS
    VIEW COMMENTS

    Additional information available

    Click on the INTERESTING button to view additional information associated with this sher.

    OKAY

    About this sher

    Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.

    Close

    rare Unpublished content

    This ghazal contains ashaar not published in the public domain. These are marked by a red line on the left.

    OKAY

    Added to your favorites

    Removed from your favorites