kai sad-hazar baras ke KHwab

tire dar se guzrā thā bārhā

vo khulā nahīñ

vahāñ dar pe pahra lagā thā gardish-e-hāl kā

maiñ tire tilism meñ band thā

mujhe thā kisī se na apne aap se vāsta

faqat ek nauha be-amāñ thā sukūt meñ

vo sukūt jis meñ bhañvar sadāoñ ke be-shumār

vahī gūñjte the vajūd meñ

koī chashm-e-shauq ko vāqiye

sar-e-rāh ab bhī milā nahīñ

to gila nahīñ

ki maiñ apnī zaat kī anjuman meñ har ik se mahv-e-kalām huuñ

mire haal kī na use ḳhabar na use ḳhabar

ki ye log

saada ġharīb muḳhlis-o-chāra-sāz

yahī log hirs meñ mubtalā jo nikāleñ kaam fareb se

na ho un sā koī zamāna-sāz

kabhī un meñ zahr anā kā hai kabhī vahm kā kabhī jahl kā

kabhī saañp andhī aqīdatoñ ke lipaT ga.e

hama-vaqt rahtī hai sīm-o-zar kī talab unheñ

ki ye ḳhvājgān-e-varam se rakhte haiñ sāz-bāz

jinheñ bandagān-e-varam kaheñ to bajā kaheñ

ki vo ḳhvāja kyā haiñ varam kī karte haiñ bandagī

unheñ mujh se milne kā shauq kyā

ye vo log haiñ jo na apne-āp se mil sake

ye unhīñ ke baare meñ thā jo khulā sahīfa-e-hast-o-būd

ye badalte chehroñ ke log

jin kā na apnā chehra na ḳhāl-o-ḳhat

usī kārvāñ meñ sharīk haiñ jo ummīd-e-vahm kī raah meñ

ka.ī sad-hazār baras se hai

ka.ī baar ubhre haiñ gard se

ka.ī baar dhuāñ meñ aT ga.e

vo jo ḳhvāb the

ka.ī sad-hazār baras ke ḳhvāb

jo yaqīñ na the jo gumāñ na the

vo jo un ke apne nigāh-o-dil pe ayaañ na the

ki ayaañ hue to bikhar ga.e

magar un kā apnā vajūd the lahū ban ke un kī ragoñ meñ paiham ravāñ bhī the

terā dar to ab bhī khulā nahīñ

magar ik ummīd kā dar khulā

ka.ī sad-hazār baras kā arsa-e-intizār guzar gayā

vo jo ḳhvāb the vo jo ḳhvāb haiñ

vahī ḳhvāb dil meñ utar paḌe

nayā rañg hai shab-o-roz kā

na.ī tābish-e-mah-o-sāl hai

hote sab ke ḳhvāb jo mere ḳhvāb

ajab us meñ lutf-e-visāl hai

tere dar se guzra tha barha

wo khula nahin

wahan dar pe pahra laga tha gardish-e-haal ka

main tere tilism mein band tha

mujhe tha kisi se na apne aap se wasta

faqat ek nauha be-aman tha sukut mein

wo sukut jis mein bhanwar sadaon ke be-shumar

wahi gunjte the wajud mein

koi chashm-e-shauq ko waqiye

sar-e-rah ab bhi mila nahin

to gila nahin

ki main apni zat ki anjuman mein har ek se mahw-e-kalam hun

mere haal ki na use KHabar na use KHabar

ki ye log

sada gharib muKHlis-o-chaara-saz

yahi log hirs mein mubtala jo nikalen kaam fareb se

na ho un sa koi zamana-saz

kabhi un mein zahr ana ka hai kabhi wahm ka kabhi jahl ka

kabhi sanp andhi aqidaton ke lipaT gae

hama-waqt rahti hai sim-o-zar ki talab unhen

ki ye KHwajgan-e-waram se rakhte hain saz-baz

jinhen bandagan-e-waram kahen to baja kahen

ki wo KHwaja kya hain waram ki karte hain bandagi

unhen mujh se milne ka shauq kya

ye wo log hain jo na apne-ap se mil sake

ye unhin ke bare mein tha jo khula sahifa-e-hast-o-bud

ye badalte chehron ke log

jin ka na apna chehra na KHal-o-KHat

usi karwan mein sharik hain jo ummid-e-wahm ki rah mein

kai sad-hazar baras se hai

kai bar ubhre hain gard se

kai bar dhuan mein aT gae

wo jo KHwab the

kai sad-hazar baras ke KHwab

jo yaqin na the jo guman na the

wo jo un ke apne nigah-o-dil pe ayan na the

ki ayan hue to bikhar gae

magar un ka apna wajud the lahu ban ke un ki ragon mein paiham rawan bhi the

tera dar to ab bhi khula nahin

magar ek ummid ka dar khula

kai sad-hazar baras ka arsa-e-intizar guzar gaya

wo jo KHwab the wo jo KHwab hain

wahi KHwab dil mein utar paDe

naya rang hai shab-o-roz ka

nai tabish-e-mah-o-sal hai

hote sab ke KHwab jo mere KHwab

ajab us mein lutf-e-visal hai