kal hi ki baat nahin hoti

dahlīz par jo ḳhvāb TuuTā hai

vo kal kā to nahīñ thā

vo to na-jāne kitne sāloñ se

nāniyoñ dādiyoñ ne alhaḌ āñkhoñ meñ jagā rakkhā thā

ye jo dīvār par lagī tasvīr achānak dhaḌām se nīche gir ga.ī hai

ye kal hī to nahīñ Tāñgī ga.ī thī

ye to us ā.īne meñ sāloñ se nazar aa rahī thī jo laḌkiyāñ takiye ke nīche

is ummīd par rakh kar sotī thiiñ ki

is raat ke ḳhvāb meñ un ke dūlhā kī shabīh ubhregī

ye jo tasvīr gir kar TuuT ga.ī hai ye sadiyoñ kī shabīh ko bhī toḌ ga.ī hai

ye jo kal dekhte hī dekhte āsmān par ek bādal kā rañg kaalā siyāh paḌ gayā thā

ye bādal sirf kal hī to nahīñ āsmān par aayā thā

ye collage ke āsmān par niile rañg meñ na-jāne kitne sāloñ se rukā huā thā

ye jo kal mohabbat aur e'timād kī tahrīr dekhte hī dekhte kāġhaz se ġhā.eb ho ga.ī

vo sirf kal hī to nahīñ likhī ga.ī thī

na-jāne kab se mohabbat kī kahāniyāñ likhne vaale use safhāt par utaar rahe the

kal jo mere darvāze ke sāmne khaḌī saḌak yakāyak kahīñ aur muḌ ga.ī

aur phir nazroñ se ojhal ho ga.ī ye sāneha sirf kal kā to nahīñ

us saḌak ne to sāloñ se rāsta badalne aur ġhā.eb hone kī Thaan rakhī thī

ḳhvāb tasvīr tahrīr bādal aur saḌak un ke TūTne aur badalne kī baat

kal hī kī baat nahīñ hotī

dahliz par jo KHwab TuTa hai

wo kal ka to nahin tha

wo to na-jaane kitne salon se

naniyon dadiyon ne alhaD aankhon mein jaga rakkha tha

ye jo diwar par lagi taswir achanak dhaDam se niche gir gai hai

ye kal hi to nahin Tangi gai thi

ye to us aaine mein salon se nazar aa rahi thi jo laDkiyan takiye ke niche

is ummid par rakh kar soti thin ki

is raat ke KHwab mein un ke dulha ki shabih ubhregi

ye jo taswir gir kar TuT gai hai ye sadiyon ki shabih ko bhi toD gai hai

ye jo kal dekhte hi dekhte aasman par ek baadal ka rang kala siyah paD gaya tha

ye baadal sirf kal hi to nahin aasman par aaya tha

ye collage ke aasman par nile rang mein na-jaane kitne salon se ruka hua tha

ye jo kal mohabbat aur e'timad ki tahrir dekhte hi dekhte kaghaz se ghaeb ho gai

wo sirf kal hi to nahin likhi gai thi

na-jaane kab se mohabbat ki kahaniyan likhne wale use safhat par utar rahe the

kal jo mere darwaze ke samne khaDi saDak yakayak kahin aur muD gai

aur phir nazron se ojhal ho gai ye saneha sirf kal ka to nahin

us saDak ne to salon se rasta badalne aur ghaeb hone ki Than rakhi thi

KHwab taswir tahrir baadal aur saDak un ke TuTne aur badalne ki baat

kal hi ki baat nahin hoti