kal ki baat lagti hai

pyaar kī kahānī bhī

muḳhtasar javānī bhī

vo ghaḌī suhānī bhī

vaqt kī ravānī bhī

kis ke haat lagtī hai

dasht bahr-o-bar ambar

phuul chashm-e-tar gauhar

ā.īna ho yā patthar

fitna-sāzī-e-manzar

vārdāt lagtī hai

tarf-e-gul khile the jab

zaḳhm hī sile the jab

ġham ke silsile the jab

tum ko kuchh gile the jab

sab kī maat lagtī hai

apnī bhuul kuchh bhī ho

aur usuul kuchh bhī ho

arz-o-tūl kuchh bhī ho

jab qubūl kuchh bhī ho

kā.enāt lagtī hai

shoḳhiyāñ irādoñ kī

nīm-jāñ murādoñ kī

ziist kam-savādoñ kī

be-shumār yādoñ kī

ik barāt lagtī hai

baḳht-e-nā-rasā.ī de

har koī duhā.ī de

jab na kuchh dikhā.ī de

kaun rahnumā.ī de

saḳht raat lagtī hai

jabr kī siyah-poshī

aur qazā kī ham-doshī

hasrat-e-vafā-koshī

maslahat kī ḳhāmoshī

bas najāt lagtī hai

uf ye daur-e-bechainī

uljhaneñ masā.il kī

soch meñ baġhāvat bhī

jis se shā.irī merī

aks-e-zāt lagtī hai

ai merī muhīt-e-jāñ

kar chuke har ik makāñ

nazr-e-shahr-e-be-mehrāñ

ab to rāhat-e-daurāñ

be-sabāt lagtī hai

jaise ḳhvāboñ kī chilman

vo ujaaḌ sā āñgan

ye harā-bharā gulshan

saal ho ga.e pachpan

kal kī baat lagtī hai

pyar ki kahani bhi

muKHtasar jawani bhi

wo ghaDi suhani bhi

waqt ki rawani bhi

kis ke hat lagti hai

dasht bahr-o-bar ambar

phul chashm-e-tar gauhar

aaina ho ya patthar

fitna-sazi-e-manzar

wardat lagti hai

tarf-e-gul khile the jab

zaKHm hi sile the jab

gham ke silsile the jab

tum ko kuchh gile the jab

sab ki mat lagti hai

apni bhul kuchh bhi ho

aur usul kuchh bhi ho

arz-o-tul kuchh bhi ho

jab qubul kuchh bhi ho

kaenat lagti hai

shoKHiyan iradon ki

nim-jaan muradon ki

zist kam-sawadon ki

be-shumar yaadon ki

ek baraat lagti hai

baKHt-e-na-rasai de

har koi duhai de

jab na kuchh dikhai de

kaun rahnumai de

saKHt raat lagti hai

jabr ki siyah-poshi

aur qaza ki ham-doshi

hasrat-e-wafa-koshi

maslahat ki KHamoshi

bas najat lagti hai

uf ye daur-e-bechaini

uljhanen masail ki

soch mein baghawat bhi

jis se shairi meri

aks-e-zat lagti hai

ai meri muhit-e-jaan

kar chuke har ek makan

nazr-e-shahr-e-be-mehran

ab to rahat-e-dauran

be-sabaat lagti hai

jaise KHwabon ki chilman

wo ujaD sa aangan

ye hara-bhara gulshan

sal ho gae pachpan

kal ki baat lagti hai