kal raat Dhale

kal raat Dhale ye sochā maiñ ne

maiñ apne ḳhazāne saaf kar luuñ

kis kis kā hai qarz mujh pe vājib

is kā bhī zarā hisāb kar luuñ

almārī kī chābī kho ga.ī thī

vo zañg bharī purānī chābī

maiñ ne use kone kone DhūñDā

mujh ko to nahīñ milī kahīñ bhī

maiñ ne jo nazar uThā ke dekhā

almārī to band hī nahīñ thī

miTTī kī tahoñ meñ lipTe jaale

ik ḳhaak kā Dher lag rahe the

vo saarī nishāniyāñ hamārī

vo saarī kahāniyāñ hamārī

sho.ale kī tarah bhaḌakne vaalī

dhaḌkan kī tarah dhaḌakne vaalī

ārām kī niiñd so rahī thiiñ

un meñ koī raushnī nahīñ thī

un meñ kahīñ zindagī nahīñ thī

kal raat Dhale ye socha main ne

main apne KHazane saf kar lun

kis kis ka hai qarz mujh pe wajib

is ka bhi zara hisab kar lun

almari ki chabi kho gai thi

wo zang bhari purani chabi

main ne use kone kone DhunDa

mujh ko to nahin mili kahin bhi

main ne jo nazar uTha ke dekha

almari to band hi nahin thi

miTTi ki tahon mein lipTe jale

ek KHak ka Dher lag rahe the

wo sari nishaniyan hamari

wo sari kahaniyan hamari

shoale ki tarah bhaDakne wali

dhaDkan ki tarah dhaDakne wali

aaram ki nind so rahi thin

un mein koi raushni nahin thi

un mein kahin zindagi nahin thi