kanar-e-ab ki ek sham

shafaq kā sonā fazā meñ tahlīl ho rahā hai

sunahre paanī kī silvaTeñ raqs kar rahī haiñ

sipahr-e-maġhrib kī marg-āmāda-o-ġhurūb-āshnā shuā.eñ

ḳhamosh lahroñ se yuuñ ham-āġhosh ho rahī haiñ

ki jaise ḳhvāboñ meñ kho rahī haiñ

shafaq kī lahreñ falak kī tābinda rahguzāroñ ko chūmtī haiñ

sahāb-pāroñ ko chūmtī haiñ

sahāb-pāroñ meñ muñh chhupā.e hue sitāroñ ko chūmtī haiñ

jabīn-e-āb-e-ravāñ pe afshāñ chamak rahī hai

tilism-āgīñ fazā-e-rañgīñ

urūs-e-sho.ala-badan kī larzāñ qabā-e-zarrīñ

qabā-e-zarrīñ kī kasmasātī gudāz lahreñ

ki mahv-e-raqs-o-ġhanā hasīñ larzisheñ badan kī

urūs-e-fitrat ke reshmīñ pairahan kā ye ātishīñ tabassum

ziyā-e-ḳhāmosh ke sukūt-āshnā tarannum meñ ghul rahā hai

ki uqda-e-gesū-e-shab-e-tār khul rahā hai

badan churā.e hue sar-e-rahguzār koī javāñ hasīna

sabā-ḳhirām-o-sabā-qarīna

ḳhamosh kuchh sochtī huī ḳhvāb-gāh-e-ishrat ko jā rahī hai

fazā-e-tārīk chhā rahī hai

shafaq ka sona faza mein tahlil ho raha hai

sunahre pani ki silwaTen raqs kar rahi hain

sipahr-e-maghrib ki marg-amada-o-ghurub-ashna shuaen

KHamosh lahron se yun ham-aghosh ho rahi hain

ki jaise KHwabon mein kho rahi hain

shafaq ki lahren falak ki tabinda rahguzaron ko chumti hain

sahab-paron ko chumti hain

sahab-paron mein munh chhupae hue sitaron ko chumti hain

jabin-e-ab-e-rawan pe afshan chamak rahi hai

tilism-agin faza-e-rangin

urus-e-shoala-badan ki larzan qaba-e-zarrin

qaba-e-zarrin ki kasmasati gudaz lahren

ki mahw-e-raqs-o-ghana hasin larzishen badan ki

urus-e-fitrat ke reshmin pairahan ka ye aatishin tabassum

ziya-e-KHamosh ke sukut-ashna tarannum mein ghul raha hai

ki uqda-e-gesu-e-shab-e-tar khul raha hai

badan churae hue sar-e-rahguzar koi jawan hasina

saba-KHiram-o-saba-qarina

KHamosh kuchh sochti hui KHwab-gah-e-ishrat ko ja rahi hai

faza-e-tarik chha rahi hai