kangan ki khanak

har qadam yaad tujhe merī bahut aa.egī

tū jahāñ jā.egī hamrāh mujhe pā.egī

tere ruḳhsār kī rañgat tire māthe kī chamak

mujh se qaa.em hai tire haath ke kañgan kī khanak

terī har saañs se vābasta haiñ sāñseñ merī

ḳhvāb tere haiñ sabhī aur haiñ āñkheñ merī

phir batā kaise judā mujh se tū ho jā.egī

tū jahāñ jā.egī hamrāh mujhe pā.egī

dil meñ raushan hai tirī yaad charāġhoñ kī tarah

mujh pe taarī hai tirā pyaar ayāġhoñ kī tarah

tū hī kah de ki tujhe dil se bhulā duuñ kaise

maiñ tire naam ko hāthoñ se miTā duuñ kaise

aa bhī jā aur mujhe kitnā tū taḌpā.egī

tū jahāñ jā.egī hamrāh mujhe pā.egī

chhoḌ dene kā kiyā kaise irāda tū ne

jis ko chāhā thā kabhī jaan se ziyādā tū ne

kyā huiiñ qasmeñ tirī aur vo va.ade tere

saath chalne ke hamesha ke irāde tere

mujh ko ma.alūm na thā utnā badal jā.egī

tū jahāñ jā.egī hamrāh mujhe pā.egī

apne va.ade ko vafā kar ke maiñ dikhlā.ūñgā

maiñ agar mar bhī gayā phir bhī tujhe chāhūñgā

tū jahāñ ke kisī goshe meñ rahegī hamdam

ho ke bechain sadā dūñgā tujhe maiñ jis dam

merī āvāz tere kaan se Takrā.egī

tū jahāñ jā.egī hamrāh mujhe pā.egī

jab bhī dekhā tirī sūrat ko hī dekhā maiñ ne

sirf aur sirf tirī kī hai tamanna maiñ ne

maiñ sivā tere kise dekhūñ nigāheñ bhar ke

jo kabhī dekhūñ mirā rab mujhe andhā kar de

dekh ab maan bhī jā varna tū pachhtā.egī

tū jahāñ jā.egī hamrāh mujhe pā.egī

har qadam yaad tujhe meri bahut aaegi

tu jahan jaegi hamrah mujhe paegi

tere ruKHsar ki rangat tere mathe ki chamak

mujh se qaem hai tere hath ke kangan ki khanak

teri har sans se wabasta hain sansen meri

KHwab tere hain sabhi aur hain aankhen meri

phir bata kaise juda mujh se tu ho jaegi

tu jahan jaegi hamrah mujhe paegi

dil mein raushan hai teri yaad charaghon ki tarah

mujh pe tari hai tera pyar ayaghon ki tarah

tu hi kah de ki tujhe dil se bhula dun kaise

main tere nam ko hathon se miTa dun kaise

aa bhi ja aur mujhe kitna tu taDpaegi

tu jahan jaegi hamrah mujhe paegi

chhoD dene ka kiya kaise irada tu ne

jis ko chaha tha kabhi jaan se ziyaada tu ne

kya huin qasmen teri aur wo wade tere

sath chalne ke hamesha ke irade tere

mujh ko malum na tha utna badal jaegi

tu jahan jaegi hamrah mujhe paegi

apne wade ko wafa kar ke main dikhlaunga

main agar mar bhi gaya phir bhi tujhe chahunga

tu jahan ke kisi goshe mein rahegi hamdam

ho ke bechain sada dunga tujhe main jis dam

meri aawaz tere kan se Takraegi

tu jahan jaegi hamrah mujhe paegi

jab bhi dekha teri surat ko hi dekha main ne

sirf aur sirf teri ki hai tamanna main ne

main siwa tere kise dekhun nigahen bhar ke

jo kabhi dekhun mera rab mujhe andha kar de

dekh ab man bhi ja warna tu pachhtaegi

tu jahan jaegi hamrah mujhe paegi