kans

us ko yuuñ lagtā thā jaise kuchh na kuchh kal ho rahegā

jab vo muḌ kar dekhtā thā us ko yuuñ lagtā thā jaise ik bahan ke saat beTe us kā pīchhā kar rahe hoñ

aa.ine meñ aks us ko sirf gardan tak dikhā.ī de rahā thā

us kī parchhā.īñ yuuñ lagtī thī ki jaise rauzanoñ se aT ga.ī

saañs kī āvāz jaane kis jagah gum ho ga.ī thī

har sitāra jaise ḳhud ko aañkh meñ dohrā rahā thā

jab vo chāhtā thā to us ke naqsh-e-pā miTTī pe bante hī nahīñ the

jaise us ne surḳh sho.ale haar meñ gūñthe hue hoñ

jaise vo mathurā meñ mādar-zād nangā phir rahā ho

aur us ko yaad aaya us ko nārad ne batāyā thā vo apne baap kā beTā nahīñ hai

us kā tanhā farz apne rishta-dāroñ par mazālim toḌnā hai

us ko kyā ma.alūm thā jab maut aa.egī to rishta-dār ban kar aa.egī

jab vo muḌ kar dekhtā thā us ko yuuñ lagtā thā jaise āThveñ beTe ke dast-e-rāst meñ

ik gadā hai jis pe us ke naam ke hijje raqam haiñ

us ko yun lagta tha jaise kuchh na kuchh kal ho rahega

jab wo muD kar dekhta tha us ko yun lagta tha jaise ek bahan ke sat beTe us ka pichha kar rahe hon

aaine mein aks us ko sirf gardan tak dikhai de raha tha

us ki parchhain yun lagti thi ki jaise rauzanon se aT gai

sans ki aawaz jaane kis jagah gum ho gai thi

har sitara jaise KHud ko aankh mein dohra raha tha

jab wo chahta tha to us ke naqsh-e-pa miTTi pe bante hi nahin the

jaise us ne surKH shoale haar mein gunthe hue hon

jaise wo mathura mein madar-zad nanga phir raha ho

aur us ko yaad aaya us ko narad ne bataya tha wo apne bap ka beTa nahin hai

us ka tanha farz apne rishta-daron par mazalim toDna hai

us ko kya malum tha jab maut aaegi to rishta-dar ban kar aaegi

jab wo muD kar dekhta tha us ko yun lagta tha jaise aaThwen beTe ke dast-e-rast mein

ek gada hai jis pe us ke nam ke hijje raqam hain