karachi ka mawasalati mushaira

ahl-e-adab ne phir ye kiyā tajraba nayā

shā.er mavāsalāt kī duniyā pe chhā gayā

mirrīḳh par mushā.era kar lo ki moon par

ham to ab apne sher sunā.eñge phone par

shā.er idhar hai, sadr udhar, sāma.īn udhar

maiñ phūñk mārtā huuñ to bajtī hai biin udhar

dūlhā ko fāsle pe rakhā hai barāt se

matlab ye hai ki duur raho shā.erāt se

America se ġhazal jo paḌhī ham ne lahr meñ

gūñjī hai us kī daad karachi ke shahr meñ

sheroñ meñ aa gayā hai jo maġhrib kā rañg-e-ḳhās

mahsūs ho rahā hai ki shā.er hai be-libās

kis haal meñ kalām-e-balāġhat huā atā

shā.er hai bath-rōm meñ saame ko kyā patā

be-shak mavāsalātī qadam inqilābī hai

aTke jahāñ pe kah diyā fannī ḳharābī hai

shā.er ne sher arz kiyā rāmpūr se

misra uThā diyā hai kisī ne qusūr se

shā.er ne jab bayāz nikālī jahāz meñ

gūñjī haiñ ''vāh-vā'' kī sadā.eñ hijāz meñ

rocket kī tarah sher gire sāma.īn par

shā.er hai āsmāñ pe tabāhī zamīn par

pahle ye hukm thā ki dalā.el se sher paḌh

aur ab ye kah rahe haiñ mobile se sher paḌh

kahte the pahle sher ko misra uThā ke paḌh

aur ab ye kah rahe haiñ ki Da.el ghumā ke paḌh

kahne lage burā.ī ko dozaḳh meñ jhoñk de

maik se duur hai to receiver meñ bhūñk de

jab daad mil rahī thī mujhe sāma.īn se

ik sher laḌ gayā thā kisī mah-jabīn se

maiñ ne jo fāsloñ kī ye dīvār paaT dī

sadr-e-girāmī ne mirī line hī kaaT dī

ahl-e-adab ne phir ye kiya tajraba naya

shaer mawasalat ki duniya pe chha gaya

mirriKH par mushaera kar lo ki moon par

hum to ab apne sher sunaenge phone par

shaer idhar hai, sadr udhar, samain udhar

main phunk marta hun to bajti hai bin udhar

dulha ko fasle pe rakha hai baraat se

matlab ye hai ki dur raho shaeraat se

America se ghazal jo paDhi hum ne lahr mein

gunji hai us ki dad karachi ke shahr mein

sheron mein aa gaya hai jo maghrib ka rang-e-KHas

mahsus ho raha hai ki shaer hai be-libas

kis haal mein kalam-e-balaghat hua ata

shaer hai bath-room mein same ko kya pata

be-shak mawasalati qadam inqilabi hai

aTke jahan pe kah diya fanni KHarabi hai

shaer ne sher arz kiya rampur se

misra uTha diya hai kisi ne qusur se

shaer ne jab bayaz nikali jahaz mein

gunji hain wah-wa ki sadaen hijaz mein

rocket ki tarah sher gire samain par

shaer hai aasman pe tabahi zamin par

pahle ye hukm tha ki dalael se sher paDh

aur ab ye kah rahe hain mobile se sher paDh

kahte the pahle sher ko misra uTha ke paDh

aur ab ye kah rahe hain ki Dael ghuma ke paDh

kahne lage burai ko dozaKH mein jhonk de

maik se dur hai to receiwer mein bhunk de

jab dad mil rahi thi mujhe samain se

ek sher laD gaya tha kisi mah-jabin se

main ne jo faslon ki ye diwar paT di

sadr-e-girami ne meri line hi kaT di