katba

ik din yūñhī chalte chalte dil kī dhaḌkan ruk jā.egī

nabz kī jumbish tham jā.egī

saarā tamāshā jin āñkhoñ se is duniyā kā dekhā hai

vo āñkheñ pathrā jā.eñgī

chashme jharne phuul kañval ke koh-o-bayābāñ dasht-o-daman

husn qad anā kā aalam sar chamelī rañg-e-chaman

sāġhar-e-mīnā aañkh kī mastī aariz kākul zulf ghaTā

naġhma ḳhushbū pyaar mohabbat raqs tabassum harf-e-vafā

sab se rishta TūTegā

barf kī sūrat jam jā.egā har jazba har ik ehsās

tārīkī meñ kho jā.egī apnī hastī apnī zaat

ik patthar par kanda hogī dhuñdlī sī tārīḳh-e-vafāt

saare shor-sharābe kā anjām faqat ḳhāmoshī hai

in raushan lamhoñ se aage āḳhirī lamha tārīkī hai

vo lamha sab kī taak meñ hai bas itnā hī yaad rakho

logo apnī qabr kā katba apne apne saath rakho

ek din yunhi chalte chalte dil ki dhaDkan ruk jaegi

nabz ki jumbish tham jaegi

sara tamasha jin aankhon se is duniya ka dekha hai

wo aankhen pathra jaengi

chashme jharne phul kanwal ke koh-o-bayaban dasht-o-daman

husn qad ana ka aalam sar chameli rang-e-chaman

saghar-e-mina aankh ki masti aariz kakul zulf ghaTa

naghma KHushbu pyar mohabbat raqs tabassum harf-e-wafa

sab se rishta TuTega

barf ki surat jam jaega har jazba har ek ehsas

tariki mein kho jaegi apni hasti apni zat

ek patthar par kanda hogi dhundli si tariKH-e-wafat

sare shor-sharabe ka anjam faqat KHamoshi hai

in raushan lamhon se aage aaKHiri lamha tariki hai

wo lamha sab ki tak mein hai bas itna hi yaad rakho

logo apni qabr ka katba apne apne sath rakho