kaun le gaya

ai yār-e-dil-nashīñ vo adā kaun le gayā

tere nagīñ se naqsh-e-vafā kaun le gayā

hal kar diyā thā jis ne muamma shabāb kā

tujh se vo fikr-e-uqda-kushā kaun le gayā

thā lutf pahle qahr meñ ab sirf qahr hai

zulmat se mauj-e-āb-e-baqā kaun le gayā

kyuuñ daf.atan laboñ pe ḳhamoshī sī chhā ga.ī

is sāz-e-dil-nashīñ kī sadā kaun le gayā

āñkhoñ se shān-e-bazl-o-saḳhā kis ne chhīn lī

siine se zauq-e-lutf-o-atā kaun le gayā

thiiñ jis kī rau se ḳhūn-e-tamannā meñ surḳhiyāñ

ruḳhsār se vo rañg-e-vafā kaun le gayā

rātoñ ko māñgnā thā duā merī diid kī

vo minnateñ vo zauq-e-duā kaun le gayā

ai shaah banda-parvar-e-sultān-e-narm-dil

dil se tire ḳhayāl-e-gadā kaun le gayā

pahlī sī vo kalām meñ narmī nahīñ rahī

guftār se mizāj-e-sabā kaun le gayā

ab 'josh' ke liye haiñ na aañsū na āh-e-sard

is gulsitāñ kī āb-o-havā kaun le gayā

ai yar-e-dil-nashin wo ada kaun le gaya

tere nagin se naqsh-e-wafa kaun le gaya

hal kar diya tha jis ne muamma shabab ka

tujh se wo fikr-e-uqda-kusha kaun le gaya

tha lutf pahle qahr mein ab sirf qahr hai

zulmat se mauj-e-ab-e-baqa kaun le gaya

kyun dafatan labon pe KHamoshi si chha gai

is saz-e-dil-nashin ki sada kaun le gaya

aankhon se shan-e-bazl-o-saKHa kis ne chhin li

sine se zauq-e-lutf-o-ata kaun le gaya

thin jis ki rau se KHun-e-tamanna mein surKHiyan

ruKHsar se wo rang-e-wafa kaun le gaya

raaton ko mangna tha dua meri did ki

wo minnaten wo zauq-e-dua kaun le gaya

ai shah banda-parwar-e-sultan-e-narm-dil

dil se tere KHayal-e-gada kaun le gaya

pahli si wo kalam mein narmi nahin rahi

guftar se mizaj-e-saba kaun le gaya

ab 'josh' ke liye hain na aansu na aah-e-sard

is gulsitan ki aab-o-hawa kaun le gaya