KHak ko main KHwar kyun karta

duā-e-ḳhair se

duā-e-maġhfirat tak kā safar puurā huā

aur ab maiñ apnī qabr meñ huuñ

zarā hairat-zada huuñ

magar ye qabr itnī tañg bilkul bhī nahīñ hai

maiñ jaisī sochtā thā

mujhe bas itr aur kāfūr kī ḳhushbū pareshāñ kar rahī hai

aur kuchh had tak ye Dore aañkh ke

añdherā hai magar vo bhī nihāyat mehrbāñ

dil rakhne vaalā

bahut mānūs sā lagtā hai sab kuchh

kuchh aisā

jaise koī apnī maañ kī kokh meñ phir lauT aayā ho

vahāñ uupar bhī kuchh halchal hai ab tak

abhī tak log miTTī de rahe haiñ jism ko mere

ye āvāzeñ bhī aa.ī haiñ

barā-e-mehrbānī apne juute khol liije

ye miTTī qabr kī hai is kī hurmat ko samajhiye

afsurda ho gayā huuñ maiñ ye sun kar

agar ye baat maiñ ne zindagī meñ jaan lī hotī

ki bas sūrat badal lene se miTTī paak ho saktī hai merī

to apnī ḳhaak ko maiñ ḳhvār kyuuñ kartā

maiñ itnā zindagī se pyaar kyuuñ kartā

dua-e-KHair se

dua-e-maghfirat tak ka safar pura hua

aur ab main apni qabr mein hun

zara hairat-zada hun

magar ye qabr itni tang bilkul bhi nahin hai

main jaisi sochta tha

mujhe bas itr aur kafur ki KHushbu pareshan kar rahi hai

aur kuchh had tak ye Dore aankh ke

andhera hai magar wo bhi nihayat mehrban

dil rakhne wala

bahut manus sa lagta hai sab kuchh

kuchh aisa

jaise koi apni man ki kokh mein phir lauT aaya ho

wahan upar bhi kuchh halchal hai ab tak

abhi tak log miTTi de rahe hain jism ko mere

ye aawazen bhi aai hain

bara-e-mehrbani apne jute khol lije

ye miTTi qabr ki hai is ki hurmat ko samajhiye

afsurda ho gaya hun main ye sun kar

agar ye baat main ne zindagi mein jaan li hoti

ki bas surat badal lene se miTTi pak ho sakti hai meri

to apni KHak ko main KHwar kyun karta

main itna zindagi se pyar kyun karta