Khaali lamhon ki nazm

na manzil kā ta.ayyun na rāstoñ kā patā

sulagtī dhuup tapte pattharoñ ke siine par

kabhī milā na milegā kisī kā naqsh-e-pā

asīr-e-sail-e-gumāñ hai urūs-e-umr-e-ravāñ

libās tañg lahū rañg

mauj-e-ḳhūñ pyāsī

sadā-ba-sahrā haiñ chīḳheñ darīda jism-e-zamīñ

tamām dil-zada chehre bujhī bujhī nazreñ

tamām bikhre irāde dhuāñ dhuāñ yādeñ

qur.ān-o-dīd kā saaya lahū kī gardish par

pashemāñ dushman-e-ādam ḳhud apnī sāzish par

havā meñ aag meñ paanī meñ TūTte rishte

shikasta qasr-e-mohabbat udaas nasloñ kā

shikasta saañs kī abtar sī koshish-e-paiham

vajūd DhūñDne kī hādsoñ ke sahrā meñ

vajūd DhūñDne kī faisloñ kī vaadī meñ

shikasta saañs kī sa.ī-e-garāñ garāñ-māya

ik iztirāb-e-tajassus fasurdagī uljhan

ḳhayāl-o-ḳhvāb kī lazzat haqīqatoñ kī chubhan

shikasta saañs kī sa.ī-e-garāñ kā sarmāya

na manziloñ kā ta.ayyun na rāstoñ kā patā

sulagtī dhuup tapte pattharoñ ke siine par

kabhī milā na milegā kisī kā naqsh-e-pā

na manzil ka tayyun na raston ka pata

sulagti dhup tapte pattharon ke sine par

kabhi mila na milega kisi ka naqsh-e-pa

asir-e-sail-e-guman hai urus-e-umr-e-rawan

libas tang lahu rang

mauj-e-KHun pyasi

sada-ba-sahra hain chiKHen darida jism-e-zamin

tamam dil-zada chehre bujhi bujhi nazren

tamam bikhre irade dhuan dhuan yaaden

quran-o-did ka saya lahu ki gardish par

pasheman dushman-e-adam KHud apni sazish par

hawa mein aag mein pani mein TuTte rishte

shikasta qasr-e-mohabbat udas naslon ka

shikasta sans ki abtar si koshish-e-paiham

wajud DhunDne ki hadson ke sahra mein

wajud DhunDne ki faislon ki wadi mein

shikasta sans ki sai-e-garan garan-maya

ek iztirab-e-tajassus fasurdagi uljhan

KHayal-o-KHwab ki lazzat haqiqaton ki chubhan

shikasta sans ki sai-e-garan ka sarmaya

na manzilon ka tayyun na raston ka pata

sulagti dhup tapte pattharon ke sine par

kabhi mila na milega kisi ka naqsh-e-pa