Khaali makan mein ek dua

shāyad itnā bujhā huā yā

itnā be-ḳhud

be-āzād

jaise sat.h-e-āb pe Thahrā pattā koī

sākit jāmid be-raftār

yā be-dar be-dīvār

mujh ko

us vīrān khañDar meñ chakrāte aaseb se koī ḳhauf nahīñ

āñgan meñ amrūd ke nīche leTā tanhā ḳhālī chup

manzar pas-e-manzar meñ gaDmaD hotā maiñ

pīpal se Takrā ke palaTtī sar ko paTaktī andhā-dhuñd hai hamla-āvar

merī pyārī dost havā

muñh zor havā

ehsās dilātī hai mujh ko

mere tan meñ man meñ jitnā sannāTā hai

us meñ to das das ākāsh guzāra kar sakte haiñ

mālik-o-maulā

āvāra sab rang hue merī āñkhoñ ke

dukh kī yādeñ ḳhvāboñ kā ruḳh moḌ chukī haiñ

maiñ kis dil se tan ke bhītar dhuup nihārūñ

bādal ke armān sajā.ūñ

aur sunahrī sabz gulābī dhānī khiḌkī

mujh meñ na khol

mere man ke andar jitnī dhund hai maulā

us ko hī kar de anmol

shayad itna bujha hua ya

itna be-KHud

be-azad

jaise sath-e-ab pe Thahra patta koi

sakit jamid be-raftar

ya be-dar be-diwar

mujh ko

us viran khanDar mein chakraate aaseb se koi KHauf nahin

aangan mein amrud ke niche leTa tanha KHali chup

manzar pas-e-manzar mein gaDmaD hota main

pipal se Takra ke palaTti sar ko paTakti andha-dhund hai hamla-awar

meri pyari dost hawa

munh zor hawa

ehsas dilati hai mujh ko

mere tan mein man mein jitna sannaTa hai

us mein to das das aakash guzara kar sakte hain

malik-o-maula

aawara sab rang hue meri aankhon ke

dukh ki yaaden KHwabon ka ruKH moD chuki hain

main kis dil se tan ke bhitar dhup nihaarun

baadal ke arman sajaun

aur sunahri sabz gulabi dhani khiDki

mujh mein na khol

mere man ke andar jitni dhund hai maula

us ko hi kar de anmol