KHabar

bail ne gaa.e kā muñh chūmā ḳhabar ban na sakī

dekhne vāloñ ko irfān-e-nazar ho na sakā

ghoḌe ne ghoḌī kā muñh chūmā ḳhabar ban na sakī

hinhināyā pe koī ahl-e-ḳhabar ho na sakā

ye ḳhabar hai ki sar-e-rāh kisī laḌkī ko

chūmtā pakḌā gayā ek sharābī laḌkā

vahīñ qānūn kī zanjīr-e-girāñ tauq banī

vahīñ aḳhbār kī surḳhī ne unheñ jā pakḌā

maiñ yahī soch rahā thā ki sar-e-shām mujhe

jaate sūraj ke bhī atvār kuchh aise hī mile

us kā muñh zard thā ehsās-e-judā.ī hogā

us ne ik badlī kā muñh chuum liyā chupke se

daf.atan badlī kā muñh surḳh huā aur hayā

dauḌī ḳhuuñ ban ke rag-o-pai meñ ki gulnār huī

us ke dāman pe chhalak uTThe sitāre aañsū

aur sūraj kī tarah ḳhud bhī vahīñ Duub ga.ī

vahī taare the magar raat ke aḳhbār-farosh

ye ḳhabar shaam se hī saare falak par pahuñchī

pahle to lākhoñ darīchoñ se nigahbāñ jhāñke

chāñdnī chhiTkī to phir chāñd ne kī rakhvālī

sub.h-dam niiñd ke maate the sabhī ahl-e-falak

sūraj aayā to kisī ko na rahā is kā ḳhayāl

vahī badlī thī ufuq par vahī unvān-e-hayā

donoñ takte rahe mab.hūt nigāhoñ se jamāl

phir mohabbat ne kiyā sabt salām-e-rañgīñ

surḳh badlī kā lahū dauḌ gayā chaar taraf

donoñ ḳhush the unheñ ma.alūm thā āzād haiñ vo

un kā milnā nahīñ insāñ kī nigāhoñ kā hadaf

maiñ ne dekhī hai magar donoñ kī ye gustāḳhī

maiñ ḳhabar detā huuñ aḳhbār ko dekho to sahī

bail ne gae ka munh chuma KHabar ban na saki

dekhne walon ko irfan-e-nazar ho na saka

ghoDe ne ghoDi ka munh chuma KHabar ban na saki

hinhinaya pe koi ahl-e-KHabar ho na saka

ye KHabar hai ki sar-e-rah kisi laDki ko

chumta pakDa gaya ek sharabi laDka

wahin qanun ki zanjir-e-giran tauq bani

wahin aKHbar ki surKHi ne unhen ja pakDa

main yahi soch raha tha ki sar-e-sham mujhe

jate suraj ke bhi atwar kuchh aise hi mile

us ka munh zard tha ehsas-e-judai hoga

us ne ek badli ka munh chum liya chupke se

dafatan badli ka munh surKH hua aur haya

dauDi KHun ban ke rag-o-pai mein ki gulnar hui

us ke daman pe chhalak uTThe sitare aansu

aur suraj ki tarah KHud bhi wahin Dub gai

wahi tare the magar raat ke aKHbar-farosh

ye KHabar sham se hi sare falak par pahunchi

pahle to lakhon darichon se nigahban jhanke

chandni chhiTki to phir chand ne ki rakhwali

subh-dam nind ke mate the sabhi ahl-e-falak

suraj aaya to kisi ko na raha is ka KHayal

wahi badli thi ufuq par wahi unwan-e-haya

donon takte rahe mabhut nigahon se jamal

phir mohabbat ne kiya sabt salam-e-rangin

surKH badli ka lahu dauD gaya chaar taraf

donon KHush the unhen malum tha aazad hain wo

un ka milna nahin insan ki nigahon ka hadaf

main ne dekhi hai magar donon ki ye gustaKHi

main KHabar deta hun aKHbar ko dekho to sahi