KHadsha

ye terī jhiil sī āñkhoñ meñ ratjagoñ ke bhañvar

ye tere phuul se chehre pe chāñdnī kī phuvār

ye tere lab ye dayār-e-yaman ke surḳh aqiiq

ye aa.ine sī jabīñ sajda-gāh-e-lail-o-nihār

ye be-niyāz ghane jañgaloñ se baal tire

ye phūltī huī sarsoñ kā aks gāloñ par

ye dhaḌkanoñ kī zabāñ bolte hue aabrū

kamand Daal rahe haiñ mire ḳhayāloñ par

tirī jabīñ pe agar hādsoñ ke naqsh ubhreñ

mizāj-e-gardish-e-daurāñ bhī laḌkhaḌā jaa.e

tū muskurā.e to sub.heñ tujhe salām kareñ

tū ro paḌe to zamāne kī aañkh bhar aa.e

magar maiñ shahr-e-havādis ke sang-zādoñ se

ye aa.ine sā badan kis tarah bachā.uñgā

mujhe ye Dar hai kisī roz tere qurb samet

maiñ ḳhud bhī dukh ke samundar meñ Duub jā.ūñgā

ye teri jhil si aankhon mein ratjagon ke bhanwar

ye tere phul se chehre pe chandni ki phuwar

ye tere lab ye dayar-e-yaman ke surKH aqiq

ye aaine si jabin sajda-gah-e-lail-o-nihaar

ye be-niyaz ghane jangalon se baal tere

ye phulti hui sarson ka aks galon par

ye dhaDkanon ki zaban bolte hue aabru

kamand Dal rahe hain mere KHayalon par

teri jabin pe agar hadson ke naqsh ubhren

mizaj-e-gardish-e-dauran bhi laDkhaDa jae

tu muskurae to subhen tujhe salam karen

tu ro paDe to zamane ki aankh bhar aae

magar main shahr-e-hawadis ke sang-zadon se

ye aaine sa badan kis tarah bachaunga

mujhe ye Dar hai kisi roz tere qurb samet

main KHud bhi dukh ke samundar mein Dub jaunga