KHarabi

ḳharābī kā āġhāz

kab aur kahāñ se huā

ye batānā hai mushkil

kahāñ zaḳhm khaa.e

kahāñ se hue vaar

ye bhī dikhānā hai mushkil

kahāñ zabt kī dhuup meñ ham bikharte ga.e

aur kahāñ tak koī sabr ham ne sameTā

sunānā hai mushkil

ḳharābī bahut saḳht-jāñ hai

hameñ lag rahā thā ye ham se ulajh kar

kahīñ mar chukī hai

magar ab jo dekhā to ye shahr meñ

shahr ke har mohalle meñ har har galī meñ

dhueñ kī tarah bhar chukī hai

ḳharābī rueñ meñ

ḳhvāboñ meñ, ḳhvāhish meñ

rishtoñ meñ ghir chukī hai

ḳharābī to lagtā hai

ḳhuuñ meñ asar kar chukī hai

ḳharābī kā āġhāz

jab bhī jahāñ se huā ho

ḳharābī ke anjām se ġhāliban

jaañ chhuḌānā hai mushkil

KHarabi ka aaghaz

kab aur kahan se hua

ye batana hai mushkil

kahan zaKHm khae

kahan se hue war

ye bhi dikhana hai mushkil

kahan zabt ki dhup mein hum bikharte gae

aur kahan tak koi sabr hum ne sameTa

sunana hai mushkil

KHarabi bahut saKHt-jaan hai

hamein lag raha tha ye hum se ulajh kar

kahin mar chuki hai

magar ab jo dekha to ye shahr mein

shahr ke har mohalle mein har har gali mein

dhuen ki tarah bhar chuki hai

KHarabi ruen mein

KHwabon mein, KHwahish mein

rishton mein ghir chuki hai

KHarabi to lagta hai

KHun mein asar kar chuki hai

KHarabi ka aaghaz

jab bhi jahan se hua ho

KHarabi ke anjam se ghaaliban

jaan chhuDana hai mushkil