KHat ka intizar

roz-o-shab rahtā hai mujh ko un ke ḳhat kā intizār

kis tarah bahlā.ūñ dil ko kis tarah pā.ūñ qarār

dar pe bāñdhe TukTukī maiñ dekhtī huuñ baar baar

paas mere aaj shāyad aa.egā paiġhām-e-yār

pā ke aahaT nāma-bar kī kuchh sukūñ paatī huuñ maiñ

ik hayāt-e-nau mujhe miltī hai khil jaatī huuñ maiñ

duur hotī hai taḌap kāfūr ho jaatī hai yaas

dekhtī huuñ shauq kī nazroñ se apnī ās-pās

naama kyā aayā ki goyā aa ga.e vo mere paas

phuul jaatī huuñ masarrat se badaltī huuñ libās

paḌhtī rahtī huuñ maiñ pahroñ ant kuchh maatā nahīñ

dard-o-ġham kī dāstāñ bhī ḳhatm hotī hai kahīñ

ḳhat ko āñkhoñ se lagā kar chūmtī huuñ dam-ba-dam

taaki qalb-e-muztarib kī saarī betābī ho kam

toltī huuñ harf saare ishq kī mīzān meñ

aur samo letī huuñ un kā husn apnī jaan meñ

roz-o-shab rahta hai mujh ko un ke KHat ka intizar

kis tarah bahlaun dil ko kis tarah paun qarar

dar pe bandhe TukTuki main dekhti hun bar bar

pas mere aaj shayad aaega paigham-e-yar

pa ke aahaT nama-bar ki kuchh sukun pati hun main

ek hayat-e-nau mujhe milti hai khil jati hun main

dur hoti hai taDap kafur ho jati hai yas

dekhti hun shauq ki nazron se apni aas-pas

nama kya aaya ki goya aa gae wo mere pas

phul jati hun masarrat se badalti hun libas

paDhti rahti hun main pahron ant kuchh mata nahin

dard-o-gham ki dastan bhi KHatm hoti hai kahin

KHat ko aankhon se laga kar chumti hun dam-ba-dam

taki qalb-e-muztarib ki sari betabi ho kam

tolti hun harf sare ishq ki mizan mein

aur samo leti hun un ka husn apni jaan mein