KHauf

saa.e saa.e jaale jaale ḳhāmoshī ḳhāmoshī sī

TuuTī TuuTī uljhī uljhī be-ḳhvābī be-ḳhvābī sī

harfoñ se bachtā bachtā ma.anī se chhuptā chhuptā

rañgoñ meñ Duubā Duubā sāñsoñ meñ ubhrā ubhrā

zarroñ meñ chamkā chamkā lahroñ meñ sahmā sahmā

tez havā ke jhoñkoñ meñ ruk ruk kar uḌtā uḌtā

nashtar zahr mohabbat dard ḳhuun ke ik ik qatre meñ

rah rah kar chubhtā chubhtā

kyā hai ye

kaun hai ye

aañsū ret bane kaise palkoñ pe chamke kaise

har manzil par lahrātā hai kab se zard pharerā kaun

TuuTe ādarshoñ ke shīshe gintā hai vo baiThā kaun

mere har iz.hār meñ pinhāñ be-ma.anī ḳhāmosh kyuuñ

mere thak ke so jaane meñ ḳhvāboñ meñ bechainī kyuuñ

mere baam se uḌ jaatā hai qatra qatra nasha kyuuñ

ye roz-o-shab saare lamhe nanhe nanhe TukḌe TukḌe

rag rag meñ paivast hue ḳhuun bane dard bane

ik muddat se sub.h-e-azal se

merī ruuh meñ kaun chhupā hai

kaun chhupā hai

sae sae jale jale KHamoshi KHamoshi si

TuTi TuTi uljhi uljhi be-KHwabi be-KHwabi si

harfon se bachta bachta mani se chhupta chhupta

rangon mein Duba Duba sanson mein ubhra ubhra

zarron mein chamka chamka lahron mein sahma sahma

tez hawa ke jhonkon mein ruk ruk kar uDta uDta

nashtar zahr mohabbat dard KHun ke ek ek qatre mein

rah rah kar chubhta chubhta

kya hai ye

kaun hai ye

aansu ret bane kaise palkon pe chamke kaise

har manzil par lahraata hai kab se zard pharera kaun

TuTe aadarshon ke shishe ginta hai wo baiTha kaun

mere har izhaar mein pinhan be-mani KHamosh kyun

mere thak ke so jaane mein KHwabon mein bechaini kyun

mere baam se uD jata hai qatra qatra nasha kyun

ye roz-o-shab sare lamhe nanhe nanhe TukDe TukDe

rag rag mein paiwast hue KHun bane dard bane

ek muddat se subh-e-azal se

meri ruh mein kaun chhupa hai

kaun chhupa hai