khiDki

ye khiḌkī

merī dost merī rafīq

merī rāzdār

mere dil kī sab dhaḌkanoñ kī amiiñ

masarrat ke lamhāt

aur be-karāñ ġham ke saa.e

sab utre merī zindagī meñ

merī sard tanhā.iyoñ meñ

usī ke sahāre

yahīñ maiñ ne sar rakh kar aksar bune

an-ginat ḳhvāb

adhūre

mukammal

hasīn

murattab kiye ḳhāke mustaqbil-e-nā-rasā ke

yahīñ se kabhī muḌ ke dekhā

ki maazī añdheroñ meñ lipTā huā hai

magar chand bārīk kirneñ bhī

dāman meñ añgḌā.iyāñ le rahī haiñ

ghaTā-Top rātoñ meñ barsāt kī

uḌeñ jaise āvāra jugnū

yahīñ maiñ ne jaanā

ki utnī hī pyārī haiñ maazī kī tārīkiyāñ

jitnī pyārī hai mustaqbil-e-nā-rasā kī chamak

magar haal

us kā kahāñ hai vajūd

zamāna hai maazī

zamāna hai mustaqbil

aur haal ek vāhima hai

kisī lamhe ko maiñ ne jab

chhūnā chāhā

phisal kar vo ḳhud ban gayā ek maazī

kisī ne kabhī haal ko apne dekhā nahīñ

kisī ne kabhī haal ko apne parkhā nahīñ

aur mustaqbil itnā hai duur

ki us tak kabhī haath pahuñchā nahīñ

tabhī to mujhe

aap ko

saarī duniyā ko

miltī hai maazī meñ apne panāh

yahāñ se bahut duur

mustaqbil-e-nā-rasā kā dhuñdalkā jahāñ

ḳhema-zan hai

sajā.ī hai maazī ne bhī dekhiye

vahīñ jugnuoñ kī barāt

kabhī mujh se dil pūchhtā hai

kabhī dil se maiñ pūchhtī huuñ

ye khiḌkī na hotī

to kyā hotā

maiñ kahāñ hotī

ye khiDki

meri dost meri rafiq

meri raazdar

mere dil ki sab dhaDkanon ki amin

masarrat ke lamhat

aur be-karan gham ke sae

sab utre meri zindagi mein

meri sard tanhaiyon mein

usi ke sahaare

yahin main ne sar rakh kar aksar bune

an-ginat KHwab

adhure

mukammal

hasin

murattab kiye KHake mustaqbil-e-na-rasa ke

yahin se kabhi muD ke dekha

ki mazi andheron mein lipTa hua hai

magar chand barik kirnen bhi

daman mein angDaiyan le rahi hain

ghaTa-Top raaton mein barsat ki

uDen jaise aawara jugnu

yahin main ne jaana

ki utni hi pyari hain mazi ki tarikiyan

jitni pyari hai mustaqbil-e-na-rasa ki chamak

magar haal

us ka kahan hai wajud

zamana hai mazi

zamana hai mustaqbil

aur haal ek wahima hai

kisi lamhe ko main ne jab

chhuna chaha

phisal kar wo KHud ban gaya ek mazi

kisi ne kabhi haal ko apne dekha nahin

kisi ne kabhi haal ko apne parkha nahin

aur mustaqbil itna hai dur

ki us tak kabhi hath pahuncha nahin

tabhi to mujhe

aap ko

sari duniya ko

milti hai mazi mein apne panah

yahan se bahut dur

mustaqbil-e-na-rasa ka dhundalka jahan

KHema-zan hai

sajai hai mazi ne bhi dekhiye

wahin jugnuon ki baraat

kabhi mujh se dil puchhta hai

kabhi dil se main puchhti hun

ye khiDki na hoti

to kya hota

main kahan hoti