KHizan ka mausam ruka hua hai

ga.ī ho jab se

maiñ ek kamre meñ band sā huuñ

tumhārī yādeñ

mire ḳhayāloñ meñ

jugnuoñ kī qatār ban kar chamak rahī haiñ

tumhārī zulfeñ

mire tasavvur kī vādiyoñ meñ mahak rahī haiñ

vo baal

chāhat kī sā'atoñ meñ

tumhāre sar se jo gir ga.e the

unheñ maiñ chun kar

baḌī mohabbat se sūñghtā huuñ

tumhāre kurte se TuuT kar jo

safed motī bikhar ga.e the

unheñ maiñ chun kar

baḌī 'aqīdat se chūmtā huuñ

vo merā kamra

tumhāre aane se

jo chaman meñ badal gayā thā

hazāroñ rangoñ ke phuul khilne lage the jis meñ

tumhāre jaane se

phir se vīrān ho gayā hai

vo dil

jo dhaḌkā thā tum se mil ke

vo phir se be-jān ho gayā hai

na ab kitāboñ meñ shā'irī hai

na ab sharāboñ meñ be-ḳhudī hai

na ab gulāboñ meñ tāzgī hai

tamām gamle

tamām paude

mirī tarah se ujaḌ chuke haiñ

har ek shai pe ḳhizāñ kā mausam rukā huā hai

mire laboñ pe

tumhāre bosoñ kī jo namī thī

vo ḳhushk hone lagī hai jānāñ

mirī nazar meñ

tumhārī āñkhoñ kā jo nasha thā

vo ḳhatm hone lagā hai jānāñ

mirī zabāñ pe

tumhāre ashkoñ kā jo namak thā

vo pāniyoñ meñ badal rahā hai

tumhārī bāñhoñ kā

merī bāñhoñ meñ

lams thā jo

vo sardiyoñ meñ badal rahā hai

tum aa bhī jaao

ki dil ko phir se

qarār aa.e

surūr aa.e

ḳhumār aa.e

ki zindagī meñ bahār aa.e

gai ho jab se

main ek kamre mein band sa hun

tumhaari yaaden

mere KHayalon mein

jugnuon ki qatar ban kar chamak rahi hain

tumhaari zulfen

mere tasawwur ki wadiyon mein mahak rahi hain

wo baal

chahat ki sa'aton mein

tumhaare sar se jo gir gae the

unhen main chun kar

baDi mohabbat se sunghta hun

tumhaare kurte se TuT kar jo

safed moti bikhar gae the

unhen main chun kar

baDi 'aqidat se chumta hun

wo mera kamra

tumhaare aane se

jo chaman mein badal gaya tha

hazaron rangon ke phul khilne lage the jis mein

tumhaare jaane se

phir se viran ho gaya hai

wo dil

jo dhaDka tha tum se mil ke

wo phir se be-jaan ho gaya hai

na ab kitabon mein sha'iri hai

na ab sharabon mein be-KHudi hai

na ab gulabon mein tazgi hai

tamam gamle

tamam paude

meri tarah se ujaD chuke hain

har ek shai pe KHizan ka mausam ruka hua hai

mere labon pe

tumhaare boson ki jo nami thi

wo KHushk hone lagi hai jaanan

meri nazar mein

tumhaari aankhon ka jo nasha tha

wo KHatm hone laga hai jaanan

meri zaban pe

tumhaare ashkon ka jo namak tha

wo paniyon mein badal raha hai

tumhaari banhon ka

meri banhon mein

lams tha jo

wo sardiyon mein badal raha hai

tum aa bhi jao

ki dil ko phir se

qarar aae

surur aae

KHumar aae

ki zindagi mein bahaar aae