khoe hue zamane

kyoñ yaad aa rahe haiñ bhūle hue fasāne

guzrī huī bahāreñ kho.e hue zamāne

yā ek barg-e-gul ko āñkheñ taras rahī haiñ

yā apne dāmanoñ meñ phūloñ ke the ḳhazāne

yā aaj ḳhāk-o-sarsar haiñ un kī vajah-e-zīnat

yā the yahī gulistāñ kal tak nigār-ḳhāne

yā aaj ḳhār-o-ḳhas bhī ham ko nahīñ mayassar

yā the kabhī guloñ ke jhurmuT meñ āshiyāne

ab tak vahī sadā.eñ kānoñ meñ aa rahī haiñ

vo chahchahe vo naġhme vo raag vo tarāne

hai yaad ham-safīro tum ko vo ahd apnā

bajte the jab ḳhushī ke har vaqt shādyāne

jab thiiñ masarratoñ kī lahreñ har ek dil meñ

har vaqt DhūñDhte the tafrīh ke bahāne

husn-o-shabāb ke vo pur-kaif ahd-e-zarrīñ

vo ishq-o-āshiqī ke dilchasp kār-ḳhāne

vo jashn-e-aish-o-rāhat vo sāz-e-lutf-o-ishrat

āñkhoñ meñ phir rahe haiñ ab tak vahī zamāne

nādāñ samajh ke ham ko sayyād ne chaman meñ

dām-e-havas bichhā kar Daale vo chand daane

jin ke liye ham ab tak pachhtā rahe haiñ hamdam

kunj-e-qafas ke andar khā khā ke tāziyāne

kyon yaad aa rahe hain bhule hue fasane

guzri hui bahaaren khoe hue zamane

ya ek barg-e-gul ko aankhen taras rahi hain

ya apne damanon mein phulon ke the KHazane

ya aaj KHak-o-sarsar hain un ki wajah-e-zinat

ya the yahi gulistan kal tak nigar-KHane

ya aaj KHar-o-KHas bhi hum ko nahin mayassar

ya the kabhi gulon ke jhurmuT mein aashiyane

ab tak wahi sadaen kanon mein aa rahi hain

wo chahchahe wo naghme wo rag wo tarane

hai yaad ham-safiro tum ko wo ahd apna

bajte the jab KHushi ke har waqt shadyane

jab thin masarraton ki lahren har ek dil mein

har waqt DhunDhte the tafrih ke bahane

husn-o-shabab ke wo pur-kaif ahd-e-zarrin

wo ishq-o-ashiqi ke dilchasp kar-KHane

wo jashn-e-aish-o-rahat wo saz-e-lutf-o-ishrat

aankhon mein phir rahe hain ab tak wahi zamane

nadan samajh ke hum ko sayyaad ne chaman mein

dam-e-hawas bichha kar Dale wo chand dane

jin ke liye hum ab tak pachhta rahe hain hamdam

kunj-e-qafas ke andar kha kha ke taziyane