KHud-farebi

tum mujhe imtihān meñ Daalo

maiñ tumheñ imtihān meñ Dālūñ

phir natīja ho jis kā rusvā.ī

aur hāsil ho shām-e-tanhā.ī

is ta.alluq kā fā.eda kyā hai

is se bachne kā rāsta kyā hai

maiñ ne pahle bhī tum ko dekhā hai

aur har baar dekhnā hai kyā

jaao tum ko na.ī hayāt mile

ḳhud-farebī se ab najāt mile

maiñ koī yaad huuñ na koī ḳhayāl

merā āshiq hai tū na shahr-e-jamāl

apnī duniyā meñ ḳhush raho jānāñ

qissa-e-dard mat kaho jānāñ

raushnī se guzar ga.e saa.e

tīrgī meñ utar ga.e saa.e

phir kahīñ naam hai na koī patā

zindagī terā ghar kahāñ hai batā

tum mujhe imtihan mein Dalo

main tumhein imtihan mein Dalun

phir natija ho jis ka ruswai

aur hasil ho sham-e-tanhai

is talluq ka faeda kya hai

is se bachne ka rasta kya hai

main ne pahle bhi tum ko dekha hai

aur har bar dekhna hai kya

jao tum ko nai hayat mile

KHud-farebi se ab najat mile

main koi yaad hun na koi KHayal

mera aashiq hai tu na shahr-e-jamal

apni duniya mein KHush raho jaanan

qissa-e-dard mat kaho jaanan

raushni se guzar gae sae

tirgi mein utar gae sae

phir kahin nam hai na koi pata

zindagi tera ghar kahan hai bata