KHud-farebi

shab ek saath guzārne vaale

din ikaTThe nahīñ guzār sakte

ki añdherā tanhā.ī kī aañkh par

uñglī rakh detā hai

aur vaslatī hijr kā saarā dukh pī jaatā hai

saverā bahut boltā hai

saare raaz kholtā hai

raat kāTnā mushkil

din us se sivā mushkil

raushnī aap ko ek saath dikhāne kā

fareb detī hai

aur shāyad kāmyāb ho jaatī hai

maiñ ne ḳhud ko

tamām umr dhoke kī saan par rakkhā

zindagī ek tanī huī rassī hai

jis par chalte hue har shai

khaa.ī mālūm hotī

yahāñ tak ki niilā āsmān bhī

aur aañsū jaise zamīñ par bikhre sitāre

nasheb se farāz tak kā safar

qadmoñ se nahīñ jazboñ se

tai hotā hai

lekin ek ma.azūr shaḳhs kyā

jaane

ki rang se ḳhushbū kā

haath chhūT jaa.e to

safar tavīl ho jaatā hai

phir na jazbe kaam aate haiñ

na hī qadam

shab ek sath guzarne wale

din ikaTThe nahin guzar sakte

ki andhera tanhai ki aankh par

ungli rakh deta hai

aur waslati hijr ka sara dukh pi jata hai

sawera bahut bolta hai

sare raaz kholta hai

raat kaTna mushkil

din us se siwa mushkil

raushni aap ko ek sath dikhane ka

fareb deti hai

aur shayad kaamyab ho jati hai

main ne KHud ko

tamam umr dhoke ki san par rakkha

zindagi ek tani hui rassi hai

jis par chalte hue har shai

khai malum hoti

yahan tak ki nila aasman bhi

aur aansu jaise zamin par bikhre sitare

nasheb se faraaz tak ka safar

qadmon se nahin jazbon se

tai hota hai

lekin ek mazur shaKHs kya

jaane

ki rang se KHushbu ka

hath chhuT jae to

safar tawil ho jata hai

phir na jazbe kaam aate hain

na hi qadam