KHud-kalami

mere ruḳhsār pe

jo halkī halkī jhuriyāñ aa ga.ī haiñ

yaqīnan us ko bhī aa ga.ī hogī

zindagī ke safar meñ

umr ke jis Dhalān par maiñ khaḌā huuñ

yaqīnan vo bhī vahīñ aa gayā hogā

roz-o-shab ke madd-o-jazr

ranj-o-ġham āñsū-o-ḳhushī

sard garm sub.h-o-shām se ulajhte hue

chaḌhtī umr kā vo chulbulā-pan jo ab sanjīdgī meñ Dhal chukā hai

ain-mumkin hai us ke bhī mizāj kā hissa hogā

haañ ye mumkin hai

ġhair-mutavaqqe taur pe

sar-e-rāh agar tum kahīñ

kabhī mil bhī jaao to

tumheñ pahchānñā mushkil bhī hogā

magar merā dil mujh se kah rahā hai

mujhe bahlā rahā hai

tum ek roz mujh se miloge

aur zarūr miloge

mere ruKHsar pe

jo halki halki jhuriyan aa gai hain

yaqinan us ko bhi aa gai hogi

zindagi ke safar mein

umr ke jis Dhalan par main khaDa hun

yaqinan wo bhi wahin aa gaya hoga

roz-o-shab ke madd-o-jazr

ranj-o-gham aansu-o-KHushi

sard garm subh-o-sham se ulajhte hue

chaDhti umr ka wo chulbula-pan jo ab sanjidgi mein Dhal chuka hai

ain-mumkin hai us ke bhi mizaj ka hissa hoga

han ye mumkin hai

ghair-mutawaqqe taur pe

sar-e-rah agar tum kahin

kabhi mil bhi jao to

tumhein pahchanna mushkil bhi hoga

magar mera dil mujh se kah raha hai

mujhe bahla raha hai

tum ek roz mujh se miloge

aur zarur miloge