KHud-kushi karne ka agla mansuba

tai huī thī ek mulāqāt railway-Track par

lekin rail-gāḌī kā engine musalsal khāñstā rahā

platform number āḳhirī par

aur phañs ga.e musāfir ek dūsre kī gāliyoñ meñ

so yak-tarfa rahī mulāqāt

khiḌkī se bāhar pukār rahā thā āsmān

magar chiTḳhinī aur frame ne jakaḌ liyā

ek dūsre kā haath

aur habs baḌhtā gayā

logoñ kī āmad-o-raft ke saath

chūlhe se der tak aatī rahīñ

dhunkī huī āvāzeñ

aur rañgīn chehre vaalī news-caster ne

dohrā.ī vahī baasī ḳhabar

ki sardī kī shiddat ke baa.is

mahñgī ho ga.ī hai aag

is liye parhez kiyā jaa.e aurteñ jalāne se

pul par izhdihām thā traffic kā

lekin kisī hādse ko dikhā.ī nahīñ dī

hamārī sūrat

aur ham nīche utar aa.e chor darvāze se

dariyā ko ḳhālī dekh kar

apnī mī.ād puurī kar chukī thiiñ

niiñd kī tamām davā.eñ

is liye zabt kar lī ga.iiñ

aur ḳhālī stores meñ tāliyāñ pīTtī rahīñ

sar-dard kī be-asar goliyāñ

mumkin hai phir se muntazir ho izrā.īl

railway-track par

lekin ham sastī kitāboñ ke ambār se

talāsh kar chuke haiñ

maut ke manzar ke ba.ad

likhe jaane vaalā qīmtī nusḳha

tai hui thi ek mulaqat railway-Track par

lekin rail-gaDi ka engine musalsal khansta raha

platform number aaKHiri par

aur phans gae musafir ek dusre ki galiyon mein

so yak-tarfa rahi mulaqat

khiDki se bahar pukar raha tha aasman

magar chiTKHini aur frame ne jakaD liya

ek dusre ka hath

aur habs baDhta gaya

logon ki aamad-o-raft ke sath

chulhe se der tak aati rahin

dhunki hui aawazen

aur rangin chehre wali news-caster ne

dohrai wahi basi KHabar

ki sardi ki shiddat ke bais

mahngi ho gai hai aag

is liye parhez kiya jae aurten jalane se

pul par izhdiham tha traffic ka

lekin kisi hadse ko dikhai nahin di

hamari surat

aur hum niche utar aae chor darwaze se

dariya ko KHali dekh kar

apni miad puri kar chuki thin

nind ki tamam dawaen

is liye zabt kar li gain

aur KHali stores mein taliyan piTti rahin

sar-dard ki be-asar goliyan

mumkin hai phir se muntazir ho izrail

railway-track par

lekin hum sasti kitabon ke ambar se

talash kar chuke hain

maut ke manzar ke baad

likhe jaane wala qimti nusKHa