KHuda se

tujh ko bhī kuchh ḳhabar hai duniyā banāne vaale

ye kār-gāh-e-hastī bāzār-e-auj-o-pastī

le dekh ho rahī hai bechainiyoñ kī bastī

tujh ko bhī kuchh ḳhabar hai duniyā banāne vaale

2

phūloñ ke chaak dāmāñ ġhunchoñ meñ soz-e-pinhāñ

gulshan bahār meñ bhī be-kaif-o-dard-sāmāñ

soz-e-darūñ nahīñ hai josh-e-junūñ nahīñ hai

dil hī se āshiqī thī dil hī meñ ḳhuuñ nahīñ hai

paimāne uTh ga.e haiñ maiḳhāne uTh ga.e haiñ

vīrāniyāñ salāmat dīvāne uTh ga.e haiñ

tujh ko bhī kuchh ḳhabar hai duniyā banāne vaale

3

māmūr-e-ġham hai duniyā dār-e-alam hai duniyā

dām-e-tavañagrī meñ said-e-sitam hai duniyā

aare se chal rahe haiñ naqshe badal rahe haiñ

insāñ kā ḳhuun pī kar insān pal rahe haiñ

mafqūd ḳhurramī hai har bazm mātamī hai

is ġham-kade kī har shai goyā jahannamī hai

tujh ko bhī kuchh ḳhabar hai duniyā banāne vaale

4

ai kār-sāz-e-ālam ai be-niyāz-e-ālam

ma.amūr-e-soz-e-ġham hai kab se ye sāz-e-ālam

māyūs ho chuke haiñ himmat hī kho chuke haiñ

insāñ bhalā.iyoñ kī qismat ko ro chuke haiñ

barbād ho rahe haiñ nāshād ho rahe haiñ

bande tire sarāpā fariyād ho rahe haiñ

tujh ko bhī kuchh ḳhabar hai duniyā banāne vaale

5

haivān bhī nahīñ haiñ insān bhī nahīñ haiñ

insāñ-numā darinde shaitān bhī nahīñ haiñ

ye zohd kī dukāneñ ye ma.asiyat kī kāneñ

ye vā.izoñ ke muñh meñ chaltī huī zabāneñ

fir.aun ho rahe haiñ mal.ūn ho rahe haiñ

maz.hab-farosh mullā qārūn ho rahe haiñ

tujh ko bhī kuchh ḳhabar hai duniyā banāne vaale

6

ai be-niyāz-e-hastī ai kār-sāz-e-hastī

kab tak rahegā yūñhī poshīda rāz-e-hastī

koī nahīñ hamārā koī nahīñ sahārā

kis samt bah rahī hai ye zindagī kī dhārā

fikr-e-davā nahīñ hai zikr-e-duā nahīñ hai

dil kah rahā hai ab to koī ḳhudā nahīñ hai

tujh ko bhī kuchh ḳhabar hai tujh ko bhī kuchh ḳhabar hai

tujh ko bhi kuchh KHabar hai duniya banane wale

ye kar-gah-e-hasti bazar-e-auj-o-pasti

le dekh ho rahi hai bechainiyon ki basti

tujh ko bhi kuchh KHabar hai duniya banane wale

2

phulon ke chaak daman ghunchon mein soz-e-pinhan

gulshan bahaar mein bhi be-kaif-o-dard-saman

soz-e-darun nahin hai josh-e-junun nahin hai

dil hi se aashiqi thi dil hi mein KHun nahin hai

paimane uTh gae hain maiKHane uTh gae hain

viraniyan salamat diwane uTh gae hain

tujh ko bhi kuchh KHabar hai duniya banane wale

3

mamur-e-gham hai duniya dar-e-alam hai duniya

dam-e-tawanagri mein said-e-sitam hai duniya

aare se chal rahe hain naqshe badal rahe hain

insan ka KHun pi kar insan pal rahe hain

mafqud KHurrami hai har bazm matami hai

is gham-kade ki har shai goya jahannami hai

tujh ko bhi kuchh KHabar hai duniya banane wale

4

ai kar-saz-e-alam ai be-niyaz-e-alam

mamur-e-soz-e-gham hai kab se ye saz-e-alam

mayus ho chuke hain himmat hi kho chuke hain

insan bhalaiyon ki qismat ko ro chuke hain

barbaad ho rahe hain nashad ho rahe hain

bande tere sarapa fariyaad ho rahe hain

tujh ko bhi kuchh KHabar hai duniya banane wale

5

haiwan bhi nahin hain insan bhi nahin hain

insan-numa darinde shaitan bhi nahin hain

ye zohd ki dukanen ye masiyat ki kanen

ye waizon ke munh mein chalti hui zabanen

firaun ho rahe hain malun ho rahe hain

mazhab-farosh mulla qarun ho rahe hain

tujh ko bhi kuchh KHabar hai duniya banane wale

6

ai be-niyaz-e-hasti ai kar-saz-e-hasti

kab tak rahega yunhi poshida raaz-e-hasti

koi nahin hamara koi nahin sahaara

kis samt bah rahi hai ye zindagi ki dhaara

fikr-e-dawa nahin hai zikr-e-dua nahin hai

dil kah raha hai ab to koi KHuda nahin hai

tujh ko bhi kuchh KHabar hai tujh ko bhi kuchh KHabar hai