KHushbu-e-watan

har taraf mahkī huī mere chaman kī ḳhushbū

hai fazāo meñ azānoñ kī bhajan kī ḳhushbū

mujh ko virse meñ milī gang-o-jaman kī ḳhushbū

merī har saañs meñ bastī hai vatan kī ḳhushbū

chhā.ī rahtī hai mire sar pe ghaTāoñ kī tarah

haañ ye ḳhushbū hai mirī maañ kī duāoñ kī tarah

dil kī duniyā huī gulzār isī ḳhushbū se

shā.erī hai mirī sarshār isī ḳhushbū se

hai ye ra.anā.ī-e-afkār isī ḳhushbū se

hai mo.attar mirā kirdār isī ḳhushbū se

ek din maiñ isī ḳhushbū hī meñ kho jā.ūñgī

oḌh kar ḳhāk-e-vatan ḳhaak meñ so jā.ūñgī

har taraf mahki hui mere chaman ki KHushbu

hai fazao mein azanon ki bhajan ki KHushbu

mujh ko wirse mein mili gang-o-jaman ki KHushbu

meri har sans mein basti hai watan ki KHushbu

chhai rahti hai mere sar pe ghaTaon ki tarah

han ye KHushbu hai meri man ki duaon ki tarah

dil ki duniya hui gulzar isi KHushbu se

shaeri hai meri sarshaar isi KHushbu se

hai ye ranai-e-afkar isi KHushbu se

hai moattar mera kirdar isi KHushbu se

ek din main isi KHushbu hi mein kho jaungi

oDh kar KHak-e-watan KHak mein so jaungi