KHwab-e-bedari

kaun hai vo

jo guzartā hai faqat āñkhoñ se ho kar

ābnā-e-zehn kī lahroñ ko chhūtā

asp-e-ābī aur sitāra machhliyoñ ko

saat rangoñ kī qabā-e-ḳhvāb detā

phail jaatā hai vo mere soch-sāgar kī tahoñ meñ

kaun hai vo

jo mirī shab-rez āñkhoñ ko

majāzī jaal meñ uljhā rahā hai

manzaroñ se sach kī mausīqī churā kar

manzaroñ kī ruuh ko be-rang kar detā hai koī

kaun hai vo jo musalsal

chāh-e-zulmat kī kagāroñ ke aqab se

haañk laatā hai

ajab chur-mur se ḳhvāboñ ke

apāhij revḌoñ ko

sochtā huuñ

muddatoñ se ḳhvāb-e-bedārī kā sahrā

jo mirī āñkhoñ meñ Dheroñ ret bhartā jā rahā hai

kaun sā jazba hai us meñ kār-farmā

kis liye vo

manzaroñ se chhantī āvāzoñ ko

apnī pyaas kī ristī añgīThī meñ

musalsal jhoñktā hai

par abhī āñkhoñ ke pīchhe

saikḌoñ āñkheñ haiñ raushan

sachchī āñkhoñ vaale nāzir

āb-ḳhoroñ se tulūa-e-fahm kā arfa.a karishma dekhte haiñ

rañg-birange pāniyoñ kī lab-kushā.ī

dā.eroñ kī shakl meñ jab phailtī hai

sachchī āñkhoñ vaale nāzir dekhte haiñ

sāmne kuchh bhī nahīñ hai

vo nahīñ maiñ bhī nahīñ

koī nahīñ

koī nahīñ bas

duur tak phailā huā

kāfūr kā ik āsmāñ hai

kaun hai wo

jo guzarta hai faqat aankhon se ho kar

aabna-e-zehn ki lahron ko chhuta

asp-e-abi aur sitara machhliyon ko

sat rangon ki qaba-e-KHwab deta

phail jata hai wo mere soch-sagar ki tahon mein

kaun hai wo

jo meri shab-rez aankhon ko

majazi jal mein uljha raha hai

manzaron se sach ki mausiqi chura kar

manzaron ki ruh ko be-rang kar deta hai koi

kaun hai wo jo musalsal

chah-e-zulmat ki kagaron ke aqab se

hank lata hai

ajab chur-mur se KHwabon ke

apahij rewDon ko

sochta hun

muddaton se KHwab-e-bedari ka sahra

jo meri aankhon mein Dheron ret bharta ja raha hai

kaun sa jazba hai us mein kar-farma

kis liye wo

manzaron se chhanti aawazon ko

apni pyas ki risti angiThi mein

musalsal jhonkta hai

par abhi aankhon ke pichhe

saikDon aankhen hain raushan

sachchi aankhon wale nazir

aab-KHoron se tulua-e-fahm ka arfa karishma dekhte hain

rang-birange paniyon ki lab-kushai

daeron ki shakl mein jab phailti hai

sachchi aankhon wale nazir dekhte hain

samne kuchh bhi nahin hai

wo nahin main bhi nahin

koi nahin

koi nahin bas

dur tak phaila hua

kafur ka ek aasman hai