KHwab jo bikhar gae

jinheñ sahar nigal ga.ii, vo ḳhvāb DhūñDhtā huuñ maiñ

kahāñ ga.ī vo niiñd kii, sharāb DhūñDhtā huuñ maiñ

mujhe namak kī kaan meñ miThās kī talāsh hai

barahnagī ke shahr meñ libās kī talāsh hai

vo barf-bāriyāñ huiiñ ki pyaas ḳhud hī bujh ga.ī

maiñ sāġharoñ ko kyā karūñ ki pyaas kī talāsh hai

ghirā huā hai abr māhtāb DhūñDhtā huuñ maiñ

jinheñ sahar nigal ga.ii, vo ḳhvāb DhūñDhtā huuñ maiñ

kahāñ ga.ī vo niiñd kī sharāb DhūñDhtā huuñ maiñ

jo ruk sake to rok do ye sail rañg-o-nūr kā

mirī nazar ko chāhiye vahī charāġh duur kā

khaTak rahī hai har kiran nazar meñ ḳhaar kī tarah

chhupā diyā hai tābishoñ ne aa.ina shu.ūr kā

nigāh-e-shauq jal uThī hijāb DhūñDhtā huuñ maiñ

jinheñ sahar nigal ga.ī vo ḳhvāb DhūñDhtā huuñ maiñ

kahāñ ga.ī vo niiñd kī sharāb DhūñDhtā huuñ maiñ

ye dhuup zard zard sī ye chāñdnī dhuāñ dhuāñ

ye tal.ateñ bujhī bujhī, ye daaġh daaġh kahkashāñ

ye surḳh surḳh phuul haiñ ki zaḳhm haiñ bahār ke

ye os kī phuvār haiñ, ki ro rahā hai āsmāñ

dil o nazar ke motiyoñ kī aab DhūñDhtā huuñ maiñ

jinheñ sahar nigal ga.ī vo ḳhvāb DhūñDhtā huuñ maiñ

kahāñ ga.ī vo niiñd kī sharāb DhūñDhtā huuñ maiñ

ye talḳh talḳh rāhateñ, jarāhateñ liye hue

ye ḳhūñ-chakāñ latāfateñ kasāfateñ liye hue

ye taar taar pairahan urūsa-e-bahār kā

ye ḳhanda-zan sadāqateñ qayāmateñ liye hue

zamīn kī tahoñ meñ āftāb DhūñDhtā huuñ maiñ

jinheñ sahar nigal ga.ī vo ḳhvāb DhūñDhtā huuñ maiñ

kahāñ ga.ī vo niiñd kī sharāb DhūñDhtā huuñ maiñ

jo marhaloñ meñ saath the vo manziloñ pe chhuT ga.e

jo raat meñ luTe na the vo dopahar meñ luT ga.e

magan thā maiñ ki pyaar ke bahut se giit gā.uñgā

zabān guñg ho ga.ii, gale meñ giit ghuT ga.e

kaTī huī haiñ uñgliyāñ rubāb DhūñDhtā huuñ maiñ

jinheñ sahar nigal ga.ī vo ḳhvāb DhūñDhtā huuñ maiñ

kahāñ ga.ī vo niiñd kī sharāb DhūñDhtā huuñ maiñ

ye kitne phuul TuuT kar bikhar ga.e ye kyā huā

ye kitne phuul shāḳhchoñ pe mar ga.e ye kyā huā

baḌhī jo tez raushnī chamak uThī ravish ravish

magar lahū ke daaġh bhī ubhar ga.e ye kyā huā

inheñ chhupā.ūñ kis tarah naqāb DhūñDhtā huuñ maiñ

jinheñ sahar nigal ga.ī vo ḳhvāb DhūñDhtā huuñ maiñ

kahāñ ga.ī vo niiñd kī sharāb DhūñDhtā huuñ maiñ

ḳhushā vo daur-e-be-ḳhudī ki justujū-e-yār thī

jo dard meñ surūr thā to be-kalī qarār thī

kisī ne zahr-e-ġham diyā to muskurā ke pī ga.e

taḌap meñ bhī sukūñ na thaa, ḳhalish bhī sāzgār thī

hayāt-e-shauq kā vahī sarāb DhūñDhtā huuñ maiñ

jinheñ sahar nigal ga.ī vo ḳhvāb DhūñDhtā huuñ maiñ

kahāñ ga.ī vo niiñd kī sharāb DhūñDhtā huuñ maiñ

ḳhulūs-e-be-shu.ūr kī vo zūd-etabāriyāñ

vo shauq-e-sāda-lauh kī hasīn ḳhām-kāriyāñ

na.ī sahar ke ḳhāl-o-ḳhad, nigāh meñ base hue

ḳhayāl hī ḳhayāl meñ, vo hāshiya-nigāriyāñ

jo de gayā fareb vo, shabāb DhūñDhtā huuñ maiñ

jinheñ sahar nigal ga.ī vo ḳhvāb DhūñDhtā huuñ maiñ

kahāñ ga.ī vo niiñd kī sharāb DhūñDhtā huuñ maiñ

vo la.al o lab ke tazkire, vo zulf o ruḳh ke zamzame

vo kārobār-e-ārzū vo valvale, vo hamhame

dil o nazar kī jaan thā vo daur jo guzar gayā

na ab kisī se dil lage na ab kahīñ nazar jame

samand-e-vaqt jā chukā rikāb DhūñDhtā huuñ maiñ

jinheñ sahar nigal ga.ī vo ḳhvāb DhūñDhtā huuñ maiñ

kahāñ ga.ī vo niiñd kī sharāb DhūñDhtā huuñ maiñ

na ishq bā-adab rahā, na husn meñ hayā rahī

havas kī dhūm-dhām hai, nagar nagar, galī galī

qadam qadam khule hue haiñ makr-o-fan ke madrase

magar ye merī sādgī to dekhiye ki aaj bhī

vafā kī dars-gāhoñ kā nisāb DhūñDhtā huuñ maiñ

jinheñ sahar nigal ga.ī vo ḳhvāb DhūñDhtā huuñ maiñ

kahāñ ga.ī vo niiñd kī sharāb DhūñDhtā huuñ meñ

bahut dinoñ meñ rāsta harīm-e-nāz kā milā

magar harīm-e-nāz tak pahuñch ga.e to kyā milā

mire safar ke sāthiyo! tumhīñ se pūchhtā huuñ maiñ

batāo kyā sanam mile, batāo kyā ḳhudā milā

javāb chāhiye mujhe javāb DhūñDhtā huuñ maiñ

jinheñ sahar nigal ga.ī vo ḳhvāb DhūñDhtā huuñ maiñ

kahāñ ga.ī vo niiñd kī sharāb DhūñDhtā huuñ maiñ

jinhen sahar nigal gai, wo KHwab DhunDhta hun main

kahan gai wo nind ki, sharab DhunDhta hun main

mujhe namak ki kan mein miThas ki talash hai

barahnagi ke shahr mein libas ki talash hai

wo barf-bariyan huin ki pyas KHud hi bujh gai

main sagharon ko kya karun ki pyas ki talash hai

ghira hua hai abr mahtab DhunDhta hun main

jinhen sahar nigal gai, wo KHwab DhunDhta hun main

kahan gai wo nind ki sharab DhunDhta hun main

jo ruk sake to rok do ye sail rang-o-nur ka

meri nazar ko chahiye wahi charagh dur ka

khaTak rahi hai har kiran nazar mein KHar ki tarah

chhupa diya hai tabishon ne aaina shuur ka

nigah-e-shauq jal uThi hijab DhunDhta hun main

jinhen sahar nigal gai wo KHwab DhunDhta hun main

kahan gai wo nind ki sharab DhunDhta hun main

ye dhup zard zard si ye chandni dhuan dhuan

ye talaten bujhi bujhi, ye dagh dagh kahkashan

ye surKH surKH phul hain ki zaKHm hain bahaar ke

ye os ki phuwar hain, ki ro raha hai aasman

dil o nazar ke motiyon ki aab DhunDhta hun main

jinhen sahar nigal gai wo KHwab DhunDhta hun main

kahan gai wo nind ki sharab DhunDhta hun main

ye talKH talKH rahaten, jarahaten liye hue

ye KHun-chakan latafaten kasafaten liye hue

ye tar tar pairahan urusa-e-bahaar ka

ye KHanda-zan sadaqaten qayamaten liye hue

zamin ki tahon mein aaftab DhunDhta hun main

jinhen sahar nigal gai wo KHwab DhunDhta hun main

kahan gai wo nind ki sharab DhunDhta hun main

jo marhalon mein sath the wo manzilon pe chhuT gae

jo raat mein luTe na the wo dopahar mein luT gae

magan tha main ki pyar ke bahut se git gaunga

zaban gung ho gai, gale mein git ghuT gae

kaTi hui hain ungliyan rubab DhunDhta hun main

jinhen sahar nigal gai wo KHwab DhunDhta hun main

kahan gai wo nind ki sharab DhunDhta hun main

ye kitne phul TuT kar bikhar gae ye kya hua

ye kitne phul shaKHchon pe mar gae ye kya hua

baDhi jo tez raushni chamak uThi rawish rawish

magar lahu ke dagh bhi ubhar gae ye kya hua

inhen chhupaun kis tarah naqab DhunDhta hun main

jinhen sahar nigal gai wo KHwab DhunDhta hun main

kahan gai wo nind ki sharab DhunDhta hun main

KHusha wo daur-e-be-KHudi ki justuju-e-yar thi

jo dard mein surur tha to be-kali qarar thi

kisi ne zahr-e-gham diya to muskura ke pi gae

taDap mein bhi sukun na tha, KHalish bhi sazgar thi

hayat-e-shauq ka wahi sarab DhunDhta hun main

jinhen sahar nigal gai wo KHwab DhunDhta hun main

kahan gai wo nind ki sharab DhunDhta hun main

KHulus-e-be-shuur ki wo zud-etabariyan

wo shauq-e-sada-lauh ki hasin KHam-kariyan

nai sahar ke KHal-o-KHad, nigah mein base hue

KHayal hi KHayal mein, wo hashiya-nigariyan

jo de gaya fareb wo, shabab DhunDhta hun main

jinhen sahar nigal gai wo KHwab DhunDhta hun main

kahan gai wo nind ki sharab DhunDhta hun main

wo lal o lab ke tazkire, wo zulf o ruKH ke zamzame

wo karobar-e-arzu wo walwale, wo hamhame

dil o nazar ki jaan tha wo daur jo guzar gaya

na ab kisi se dil lage na ab kahin nazar jame

samand-e-waqt ja chuka rikab DhunDhta hun main

jinhen sahar nigal gai wo KHwab DhunDhta hun main

kahan gai wo nind ki sharab DhunDhta hun main

na ishq ba-adab raha, na husn mein haya rahi

hawas ki dhum-dham hai, nagar nagar, gali gali

qadam qadam khule hue hain makr-o-fan ke madrase

magar ye meri sadgi to dekhiye ki aaj bhi

wafa ki dars-gahon ka nisab DhunDhta hun main

jinhen sahar nigal gai wo KHwab DhunDhta hun main

kahan gai wo nind ki sharab DhunDhta hun mein

bahut dinon mein rasta harim-e-naz ka mila

magar harim-e-naz tak pahunch gae to kya mila

mere safar ke sathiyo! tumhin se puchhta hun main

batao kya sanam mile, batao kya KHuda mila

jawab chahiye mujhe jawab DhunDhta hun main

jinhen sahar nigal gai wo KHwab DhunDhta hun main

kahan gai wo nind ki sharab DhunDhta hun main