KHwab-kar

maiñ ne ḳhvāboñ ke hasīñ jaal bune

chāñdnī shab kī bahāroñ meñ kabhī

sub.h ke phaile chanāroñ meñ kabhī

din ke hangāmoñ ke har pahlū meñ

shaam ke baḌhte hue jaadū meñ

maiñ ne jab chāhā na.e phuul chune

maiñ ne ḳhvāboñ ke hasīñ jaal bune

apne har ḳhvāb meñ paayā tum ko

maañd karte hue tāroñ ke diye

gungunāte hue chashmoñ ko liye

muskurāte hue paas aate hue

dām-e-āġhosh meñ rah jaate hue

maiñ ne yuuñ apnā banāyā tum ko

apne har ḳhvāb meñ paayā tum ko

ik girāñ lamhe kī rau meñ ik din

tum ko afsāna sunāyā apnā

raaz koī na chhupāyā apnā

apne ḳhvāboñ kī dikhā.ī duniyā

ārzūoñ se sajā.ī duniyā

husn-e-gul-rang kī zau meñ ik din

ik girāñ lamhe kī rau meñ ik din

tum ne kyā samjhā na jaanā barsoñ

maiñ fusūñ-sāz bahānoñ meñ rahā

dhyān ke lākhoñ Thikānoñ meñ rahā

har kaThin raah ko āsāñ dekhā

hasratoñ ko bhī ġhazal-ḳhvāñ dekhā

yaad aayā vo zamāna barsoñ

tum ne kyā samjhā na jaanā barsoñ

ab na vo ḳhvāb na vo bāteñ haiñ

tum bhī pahle se nahīñ ho shāyad

apnī fitrat se qarīñ ho shāyad

vaqt ne manzileñ kī haiñ kyā tai

mujh se begāna huī hai har shai

har taraf phailī siyah rāteñ haiñ

ab na vo ḳhvāb na vo bāteñ haiñ

main ne KHwabon ke hasin jal bune

chandni shab ki bahaaron mein kabhi

subh ke phaile chanaron mein kabhi

din ke hangamon ke har pahlu mein

sham ke baDhte hue jadu mein

main ne jab chaha nae phul chune

main ne KHwabon ke hasin jal bune

apne har KHwab mein paya tum ko

mand karte hue taron ke diye

gungunate hue chashmon ko liye

muskuraate hue pas aate hue

dam-e-aghosh mein rah jate hue

main ne yun apna banaya tum ko

apne har KHwab mein paya tum ko

ek giran lamhe ki rau mein ek din

tum ko afsana sunaya apna

raaz koi na chhupaya apna

apne KHwabon ki dikhai duniya

aarzuon se sajai duniya

husn-e-gul-rang ki zau mein ek din

ek giran lamhe ki rau mein ek din

tum ne kya samjha na jaana barson

main fusun-saz bahanon mein raha

dhyan ke lakhon Thikanon mein raha

har kaThin rah ko aasan dekha

hasraton ko bhi ghazal-KHwan dekha

yaad aaya wo zamana barson

tum ne kya samjha na jaana barson

ab na wo KHwab na wo baaten hain

tum bhi pahle se nahin ho shayad

apni fitrat se qarin ho shayad

waqt ne manzilen ki hain kya tai

mujh se begana hui hai har shai

har taraf phaili siyah raaten hain

ab na wo KHwab na wo baaten hain