KHwab ke jharoke se

'ajab ḳhvāb dekhā hai kal raat maiñ ne

'ajab ek duniyā hai ābād jis meñ

'ajab sā samāñ hai 'ajab sī fazā hai

'ajab sī zamīñ hai 'ajab āsmāñ hai

ka.ī miil phailā huā ek jangal

vo jangal ki jis meñ bahut duur tak bhī

kahīñ zindagī kā hai imkān koī

na koī pata hai

nabātāt haiñ na jamādāt koī

na haivān haiñ yaañ na insān koī

faqat ek vīrānī hadd-e-nazar tak nazar aa rahī hai

magar ek dariyā vahīñ par ravāñ hai

vo dariyā ki jis meñ haiñ guzre dinoñ ke ka.ī raaz pinhāñ

usī ke kināre pe tanhā hirāsāñ

maiñ kab se khaḌā huuñ

use pūchhtā huuñ

ye jangal hai vīrān-o-sunsān jitnā

ye pahle kahāñ thā

ki pahle to itnī udāsī nahīñ thī

yahāñ zindagī thī

vo paude vo sabze vo nadiyāñ vo jharne

daraḳht aur daraḳhtoñ kī shāḳhoñ pe gaate hue vo parinde

vo sab kuchh kahāñ hai

vo gul-rū gul-andām-o-gul-band merā

mire saath meñ aayā kartā thā aksar

kināre pe tere

vo āḳhir kahāñ hai

'ajab KHwab dekha hai kal raat main ne

'ajab ek duniya hai aabaad jis mein

'ajab sa saman hai 'ajab si faza hai

'ajab si zamin hai 'ajab aasman hai

kai mil phaila hua ek jangal

wo jangal ki jis mein bahut dur tak bhi

kahin zindagi ka hai imkan koi

na koi pata hai

nabaatat hain na jamadat koi

na haiwan hain yan na insan koi

faqat ek virani hadd-e-nazar tak nazar aa rahi hai

magar ek dariya wahin par rawan hai

wo dariya ki jis mein hain guzre dinon ke kai raaz pinhan

usi ke kinare pe tanha hirasan

main kab se khaDa hun

use puchhta hun

ye jangal hai viran-o-sunsan jitna

ye pahle kahan tha

ki pahle to itni udasi nahin thi

yahan zindagi thi

wo paude wo sabze wo nadiyan wo jharne

daraKHt aur daraKHton ki shaKHon pe gate hue wo parinde

wo sab kuchh kahan hai

wo gul-ru gul-andam-o-gul-band mera

mere sath mein aaya karta tha aksar

kinare pe tere

wo aaKHir kahan hai