KHwab

na jaane kaun sī saa.at meñ ye gumān huā

ba.iid ḳhvāb ke rauzan se jhāñktā hai koī

ġhunūda zehn ke āfāq ho ga.e raushan

kasal ke saath shu.ūr-e-zamāñ huā bedār

pas-e-shu.ūr jo bikhre paḌe the mashkīze

tulūa-e-zāt ke ehsās se hue labrez

magar vo ḳhvāb jo ġharq-e-shu.ūr the yaksar

bisāt-e-chashm pe jin ko abhī ubharnā thā

vo saare ḳhvāb kahīñ aur kar ga.e hijrat

vo ḳhvāb jo mire maazī ke ābgīne the

vo ḳhvāb jin se mirā haal thā abhī mansūb

vo ḳhvāb jo mirī maujūdgī ke zāmin the

jo ābnā-e-tasavvur kī lahr bante the

bisāt-e-chashm pe jin ko abhī ubharnā thā

vo saare ḳhvāb kahīñ aur kar ga.e hijrat

na jaane kaun sī saa.at meñ ye gumān huā

ba.iid ḳhvāb ke rauzan se jhāñktā hai koī

na jaane kaun si saat mein ye guman hua

baid KHwab ke rauzan se jhankta hai koi

ghunuda zehn ke aafaq ho gae raushan

kasal ke sath shuur-e-zaman hua bedar

pas-e-shuur jo bikhre paDe the mashkize

tulua-e-zat ke ehsas se hue labrez

magar wo KHwab jo gharq-e-shuur the yaksar

bisat-e-chashm pe jin ko abhi ubharna tha

wo sare KHwab kahin aur kar gae hijrat

wo KHwab jo mere mazi ke aabgine the

wo KHwab jin se mera haal tha abhi mansub

wo KHwab jo meri maujudgi ke zamin the

jo aabna-e-tasawwur ki lahr bante the

bisat-e-chashm pe jin ko abhi ubharna tha

wo sare KHwab kahin aur kar gae hijrat

na jaane kaun si saat mein ye guman hua

baid KHwab ke rauzan se jhankta hai koi