KHwabon ki badli thi wo ek

ḳhvāboñ kī badlī thī vo ek

ghumaḌ ghumaḌ ke aadhī raat ko chhā.ī thī vo

kyā kyā na asbāb sameTe

kitne lamhe kitnī yādeñ

siilī giilī

tārīḳheñ to calendar ko

chhoḌ ke kab kī jā hī chukī thiiñ

jo bhī bachā thā

vaqt sameT ke uupar rakkhā

ghar kī ek ek chiiz pe jo vo

lams chhupā thā bah na jaa.e

us kī ḳhātir

jism pe us ko dhaar liyā thā

kuchh bhī to bachnā mushkil thā

palkoñ tak paanī aatā thā

kaisā to sailāb bapā thā

koshish itnī karne par bhī

sub.h huī to kuchh bhī mere paas nahīñ thā

aañsū tak bhī merā dāman chhoḌ chuke the

ḳhvāboñ kī kaisī badlī thī

KHwabon ki badli thi wo ek

ghumaD ghumaD ke aadhi raat ko chhai thi wo

kya kya na asbab sameTe

kitne lamhe kitni yaaden

sili gili

tariKHen to calendar ko

chhoD ke kab ki ja hi chuki thin

jo bhi bacha tha

waqt sameT ke upar rakkha

ghar ki ek ek chiz pe jo wo

lams chhupa tha bah na jae

us ki KHatir

jism pe us ko dhaar liya tha

kuchh bhi to bachna mushkil tha

palkon tak pani aata tha

kaisa to sailab bapa tha

koshish itni karne par bhi

subh hui to kuchh bhi mere pas nahin tha

aansu tak bhi mera daman chhoD chuke the

KHwabon ki kaisi badli thi